10.08.2026, 00:03
Қазақстанда ауыл шаруашылығында жасанды интеллект пен спутниктік мониторингті қолдану кеңейтіледі
Статистикалық есепті жетілдіру саланы тиімді жоспарлау мен мемлекеттік қолдау шараларын бақылаудың негізіне айналады
С. Сейфуллин атындағы Қазақ агротехникалық зерттеу университетінде ауыл шаруашылығы статистикасының дұрыстығын қамтамасыз ету және мемлекеттік субсидияларды төлеу кезінде заңбұзушылықтардың алдын алу мәселелеріне арналған Ведомствоаралық жұмыс тобының алтыншы отырысы өтті.
Отырысқа Қазақстан Республикасы Ауыл шаруашылығы министрлігінің, Ұлттық статистика бюросының, Индустрия және инфрақұрылымдық даму министрлігінің, «Қазақстан Ғарыш Сапары» ҰК» АҚ-ның, Қаржылық мониторинг агенттігінің, Жоғары аудиторлық палатаның, Ұлттық қауіпсіздік комитетінің, «Бәйтерек» ҰБХ» АҚ-ның, сондай-ақ ғылыми қауымдастықтың өкілдері қатысты.
Ауыл шаруашылығы вице-министрі Аманғалий Бердалин статистикалық деректердің дұрыстығын қамтамасыз ету мемлекеттік жоспарлау мен саланың дамуын болжау үшін стратегиялық маңызға ие екенін атап өтті. Оның айтуынша, Ауыл шаруашылығы министрлігінің бастамасымен 2024 жылы жүргізілген бірлескен тексеру нәтижесінде статистикалық есептен 2 млн бас ірі қара мал, 3,2 млн бас қой мен ешкі, 3 млн тонна сүт, 1,7 млн тонна картоп және 300 мың тоннадан астам пияз шығарылды.
Вице-министрдің айтуынша, алдағы жұмыс ақпараттық жүйелерді біріктіру және ведомствоаралық деректер алмасуды дамыту арқылы жүйелі есеп жүргізуге бағытталуы тиіс.
Отырыс қорытындысы бойынша спутниктік мониторинг арқылы бақыланатын ауыл шаруашылығы дақылдарының тізімін кеңейту, С. Сейфуллин атындағы ҚазАТЗУ ғалымдарымен бірлесіп жасанды интеллект технологияларын кеңінен қолдану, сондай-ақ агросақтандыру мен мемлекеттік субсидияларды бақылау үшін Жерді қашықтан зондтау (ЖҚЗ) деректерін пайдалану туралы шешім қабылданды.
