02.09.2026, 00:04
Қазақстанда азық-түлік тауарлары бағасының өсуі баяулады
Тамызда азық-түлік тауарлары бойынша айлық дефляция 0,1% құрады
2026 жылғы тамызда Қазақстандағы айлық инфляция шілде айындағы деңгейде сақталып, 0,6% құрады. Бұл ретте жыл басынан бері алғаш рет азық-түлік тауарлары бағасының төмендеуі тіркелді — айлық дефляция 0,1% болды. Мұндай деректерді Ұлттық статистика бюросы келтірді.
Тамызда бағаның негізгі төмендеуі маусымдық жеміс-көкөніс өнімдеріне тиесілі болды.
Жылдық көрсеткіште де баяулау байқалады. Егер 2025 жылғы желтоқсанда азық-түлік инфляциясы 13,5% болса, 2026 жылғы тамыздың қорытындысы бойынша көрсеткіш 9,5%-ға дейін төмендеді.
Үкімет азық-түлік өнімдерінің түпкілікті құнын қалыптастыратын факторларды төмендетуге бағытталған шараларды қабылдауды жалғастыруда. Атап айтқанда, көлік шығындарын азайту үшін азық-түлік тауарларын теміржол арқылы тасымалдауға жеңілдетілген тариф қолданылады. Бұл шараны қазірдің өзінде 50-ден астам компания пайдаланып, 38 мың тонна өнім тасымалдады.
Әлеуметтік маңызы бар азық-түлік тауарларын өндірушілер үшін электр энергиясы тарифін 20%-ға төмендету қарастырылған. Қолдау босату бағаларын ұстап тұру бойынша қарсы міндеттемелер қабылданған жағдайда көрсетіледі.
Сонымен қатар тұрақтандыру қорларының жұмысына қатысты тәсілдер қайта қаралуда. Негізгі көрсеткіш сатып алынған өнім немесе игерілген қаражат көлемі емес, қабылданған шаралардың тауарлардың түпкілікті құнына нақты әсері болмақ. Тұрақтандыру тетіктерін әрбір нақты тауар мен өңірдегі жағдайды ескере отырып, атаулы түрде қолдану жоспарлануда.
Сонымен бірге өнім қозғалысына және әлеуметтік-кәсіпкерлік корпорациялар арқылы бағытталатын қаражаттың тиімді пайдаланылуына бақылау күшейтілуде.
