31.07.2026, 01:42
Қазақстанда күздік дәнді дақылдарды жинау аяқталуға жақын: 1,3 млн тонна астық бастырылды
Жаңа өнімді қабылдау үшін астық қоймаларында 10,8 млн тоннадан астам бос сақтау қуаты дайындалды
Қазақстанда күздік дәнді дақылдарды жинау науқаны аяқталуға жақын. Облыс әкімдіктерінің жедел мәліметтеріне сәйкес, орташа өнімділік гектарына 19,1 центнерді құрады, ал бастырылған астық көлемі 1,3 млн тоннаға жетті. Оның ішінде 890,4 мың тоннасы – бидай. Өңірлердің мәліметінше, дәнді және майлы дақылдар егісінің 99%-ы жақсы және қанағаттанарлық жағдайда. Бұл туралы Ауыл шаруашылығы министрі Айдарбек Сапаровтың төрағалығымен өткен кеңесте мәлім болды.
Жаңа өнімді кедергісіз қабылдау үшін Ауыл шаруашылығы министрлігі облыс әкімдіктерімен және «Азық-түлік келісімшарт корпорациясы» ҰК» АҚ-мен бірлесіп астық сақтау қоймаларының қуаттарын босату жұмыстарын жүргізуде.
Qoldau.kz порталының мәліметінше, қазіргі уақытта лицензияланған астық қоймаларына 2,4 млн тонна астық орналастырылған, ал бос сақтау қуаты 10,8 млн тоннаны құрайды. Бұл жаңа өнімді ешқандай шектеусіз қабылдауға мүмкіндік береді.
Маусымдық егіс және егін жинау жұмыстарын жүргізу үшін Энергетика министрлігі аграршыларға жеңілдетілген бағамен 401 мың тонна дизель отынын бөлді. Сонымен қатар ауыл шаруашылығы тауарын өндірушілерге 1,9 млн тонна минералдық тыңайтқыш жөнелтілді.
Көктемгі егіс және егін жинау жұмыстарын жеңілдетілген несиелеу бағдарламасы аясында қаржыландыруға 750 млрд теңге қарастырылған. Бүгінгі күні аграршылар осы қаражаттың 641 млрд теңгеден астамын игерді.
