Айдарбек Сапаров Қостанай облысындағы ірі аграрлық инвестициялық жобалардың жүзеге асырылуын бағалады

Ауыл шаруашылығы министрі Айдарбек Сапаров жұмыс сапары барысында Қостанай облысындағы агроөнеркәсіптік кешендегі ірі инвестициялық жобалардың жүзеге асырылу барысымен танысты. Негізгі назар ауыл шаруашылығы өнімдерін терең өңдеуді, экспорттық жеткізілімдерді және заманауи сақтау инфрақұрылымын дамытатын кәсіпорындарға аударылды.

Министр барған нысандардың бірі – бұршақ тұқымдас дақылдарды өңдеуге маманданған жоғары технологиялық «KAIZEN» ЖШС болды. Кәсіпорын бұршақ, қызыл және жасыл жасымық, ноқат пен бидайдан өнім шығарады. Зауыттың өндірістік қуаты жылына 180 мың тоннаға дейін шикізат өңдеуге мүмкіндік береді.

Кәсіпорын өнімі Ауғанстан, Түркия, Үндістан, Алжир және Қырғызстан нарықтарына экспортталады.

Биыл компания жылына 90 мың тонна макарон өнімдерін өндіретін жаңа өндіріс салу жобасын іске асыруды бастайды. Жобаның құны – 7 млрд теңге.

Айдарбек Сапаров агроөнеркәсіптік кешеннің бәсекеге қабілеттілігі тек өндірілген шикізат көлеміне ғана емес, сонымен қатар оны терең өңдеуге, заманауи сақтау инфрақұрылымына және тиімді логистикаға байланысты екенін атап өтті. Оның айтуынша, Мемлекет басшысының тапсырмасы бойынша жоғары қосылған құны бар өндірістерді іске асыратын инвесторларға жан-жақты қолдау көрсетіледі.

Жұмыс сапары барысында министр сондай-ақ «Halyk Agro KST» ЖШС-нің заманауи көкөніс қоймасы құрылысының барысымен танысты. Нысанның бір мезгілде сақтау қуаты 5,2 мың тоннаны құрайды.

Бұл жоба Солтүстік Қазақстан облысының тәжірибесін тарату бағдарламасы аясында биыл жеңілдетілген қаржыландыру алған Қостанай облысындағы үш жаңа инвестициялық жобаның қатарына енді.

Нысанда негізгі дайындық жұмыстары аяқталып, металл конструкциялардың едәуір бөлігі орнатылған. Қазіргі уақытта ғимарат қаңқасын тұрғызу және технологиялық секцияларды монтаждау жалғасуда.

«Halyk Agro KST» ЖШС директоры Бәкір Бекіров «Кең дала 2» бағдарламасына қатысу кәсіпорынның өндірістік қуатын кеңейтуге және материалдық-техникалық базасын нығайтуға мүмкіндік бергенін атап өтті.

Оның айтуынша, бес жыл бұрын шаруашылық шағын отбасылық бизнес болған. Үкімет пен Ауыл шаруашылығы министрлігінің дәйекті қолдауының арқасында кәсіпорын өндіріс көлемін ұлғайтып, әрі қарай дамуға инвестиция салуға мүмкіндік алды.

Қостанай облысы аграрлық саладағы инвестициялық әлеуетін жүйелі түрде арттыруда. 2026–2028 жылдарға арналған Жол картасы аясында өңірде жалпы құны 553,1 млрд теңге болатын 42 инвестициялық жоба қалыптастырылған.

2026 жылы жалпы құны 34,9 млрд теңге болатын алты ірі нысанды пайдалануға беру жоспарланған. Олардың қатарында бес сүт-тауар фермасы және заманауи азық-түлік өндірісі кешені бар.

Өңірдің ауыл шаруашылығы тауарын өндірушілері мемлекеттік қолдау шараларын белсенді пайдаланып келеді. «Кең дала 2» бағдарламасы бойынша көктемгі егіс және егін жинау жұмыстарын жүргізуге 569-дан астам шаруашылыққа 52 млрд теңге көлемінде жеңілдетілген қаржыландыру берілді.

Бұл қаржы 662,5 мың гектар егіс алқабын қажетті ресурстармен қамтамасыз етуге мүмкіндік берді.

Саланы техникалық жаңғыртуға да елеулі қолдау көрсетілуде. Жеңілдетілген лизинг бағдарламасы аясында өңірде жалпы құны 40,7 млрд теңгеге 641 бірлік ауыл шаруашылығы техникасын сатып алуға 499 шарт жасалған.

Биыл Қостанай облысының жалпы егіс алқабы 5,54 млн гектарды құрады. Оның ішінде дәнді және бұршақ тұқымдас дақылдар – 4 млн гектарды, майлы дақылдар – 887 мың гектарды, мал азықтық дақылдар – 559 мың гектарды, ал картоп – 10,8 мың гектарды алып жатыр.

Егіс жұмыстарын жүргізу үшін өңір аграршыларына жеңілдетілген бағамен 73,2 мың тонна дизель отыны бөлінді.

Жұмыс сапарының қорытындысында Айдарбек Сапаров ауыл шаруашылығы тауарын өндірушілерге мемлекеттік қолдаудың кең ауқымды құралдары қолжетімді екенін атап өтті.

Министр жергілікті атқарушы органдар әрбір инвестициялық жобаның іске асырылуын, мемлекеттік қаражаттың уақытылы игерілуін және құрылыс нысандарының аяқталуын қатаң бақылауға алуы тиіс екенін айтты. Сонымен қатар өңірлерге алдағы егін жинау науқанына сапалы дайындалу тапсырылды.