03.03.2026, 12:04
АКК жаздық дақылдар егістіктерін сақтандыруды субсидиялауды жалғастыруда
Өтінімдерді қабылдау мерзімдері өңірлік ерекшеліктерді ескере отырып белгіленген
«Аграрлық несие корпорациясы» АҚ 2026 жылғы науқан аясында жаздық дақылдар егістіктерін құрғақшылық тәуекелінен сақтандыруды субсидиялау бойынша өтінімдер қабылдауды жалғастыруда. Бағдарлама шарттарына сәйкес сақтандыру сыйақысының 80%-ы мемлекеттік қаражат есебінен өтеледі, ал қалған 20%-ын ауыл шаруашылығы тауарын өндіруші төлейді.
Сақтандыру қорғауы суарылмайтын жерлерге, вегетацияның 2 және 3 фазаларына қолданылады. Өтінім беру мерзімдері өңірлік ерекшеліктерге сәйкес белгіленген.
Ақмола, Ақтөбе, Атырау, Шығыс Қазақстан, Батыс Қазақстан, Қарағанды, Қостанай, Павлодар, Солтүстік Қазақстан облыстары, сондай-ақ Абай және Ұлытау облыстары үшін дәнді дақылдар бойынша өтінімдер 2026 жылғы 1 сәуірге дейін, майлы дақылдар бойынша 15 сәуірге дейін қабылданады.
Алматы, Жамбыл, Қызылорда, Маңғыстау, Түркістан облыстары және Жетісу облысының аграршылары үшін дәнді және майлы дақылдар бойынша өтінім беру мерзімі 2026 жылғы 3 наурызға дейін ұзартылды.
Сақтандыру рәсімі Kezekte.kz платформасындағы АӨК сақтандырудың онлайн-жүйесі арқылы жүзеге асырылады. Жеке кабинетте фермер сақтандырылатын алқаптарды көрсетіп, сақтандыру компаниясын таңдап, келісімшарт жасайды және сақтандыру сыйақысының 20%-ын төлейді. Қалған сома мемлекет тарапынан субсидия ретінде сақтандырушыға аударылады.
Бағдарламаны іске асыру ықтимал құрғақшылық жағдайында ауыл шаруашылығы өндірушілерінің тәуекелдерін азайтуға және жаздық дақылдар өндірісінің тұрақтылығын қамтамасыз етуге бағытталған.
