2025 жылдың төрт айында Қазақстанның АӨК-на салынған инвестиция көлемі екі еседен асты

2025 жылдың қаңтар–сәуір айларында Қазақстанның агроөнеркәсіптік кешеніне 213 млрд теңге инвестиция тартылды – бұл өткен жылдың дәл осы кезеңімен салыстырғанда 118% көп. Бұл күрт өсім инвесторлар тарапынан салаға жоғары қызығушылық барын және отандық ауыл шаруашылығына деген сенімнің айтарлықтай артқанын көрсетеді. Бұл туралы Ауыл шаруашылығы вице-министрі Ермек Кенжеханұлы ОКҚ-де өткен баспасөз конференциясында айтты.

Оның айтуынша, тікелей шетелдік инвестициялар көлемі 26 миллион АҚШ долларын құрады.

АӨК жол картасы: 3,3 трлн теңгеге 677 жоба
Ауыл шаруашылығы министрлігі әкімдіктермен бірлесе отырып, 2025–2027 жылдарға арналған АӨК инвестициялық жобаларының Жол картасын әзірледі. Құжат аясында жалпы сомасы 3,3 трлн теңге болатын 677 жоба іске асырылады. Оның ішінде 611,2 млрд теңгеге 282 жоба 2025 жылы іске қосылуы тиіс.

Министрлік «СҚО тәжірибесін тарату» бағдарламасын қаржыландыруды жалғастыруда. 2025 жылы бұл мақсатқа 154 жобаны жүзеге асыру үшін 200 млрд теңге бөлінді. Былтыр осы бағдарлама бойынша 96 жобаға 100 млрд теңге бөлініп, оның төртеуі іске қосылған.

Ел бойынша жаңа өндірістік нысандар
Басты бағыттардың бірі – өңірлерде ірі өңдеу кәсіпорындарын іске қосу. Түркістан облысында жылына 150 мың тонна өнім өңдейтін жүгері зауыты салынып жатыр. ШҚО-да жылына 169 мың тонна өсімдік майын өндіретін май зауытының құрылысы жүріп жатыр. Жамбыл облысында жылына 25 мың тонна өнім өндіретін құс фабрикасы ашылмақ. Бұл кәсіпорындар ішкі өңдеуді арттырып қана қоймай, импортқа тәуелділікті азайтады және отандық агроөнімнің экспорттық әлеуетін күшейтеді.

Шетелдік инвестициялар: трансұлттық алпауыттар қатысуда
ҚР Ауыл шаруашылығы министрлігінің мәліметінше, бүгінде елде 15 ірі шетелдік компания өз жобаларын жүзеге асыруда. Жалпы инвестиция көлемі 4 трлн теңгені құрайды.

2025 жылы екі ірі келісімге қол қойылды:
• Түркиялық Alsera компаниясымен 500 гектар жылыжай кешенін салу,
• Араб QazaqArab Sugar компаниясымен қант зауытын іске қосу.
Қазір тағы сегіз ірі келісімшарт дайындалуда:
• Қытайлық Fufeng Group-пен жүгеріні терең өңдеу жобасы,
• PepsiCo-мен бірге Алматы облысында тұзды жеңіл тағамдар шығаратын зауыт салу,
• Венгриялық UBM Group-пен әр аймақта құрама жем зауыттарын салу,
• Қытайлық Dalian Hesheng және түрік Tiryaki Holding-пен астық пен бұршақты дақылдарды өңдеу жобалары.

Вице-министр атап өткендей, мемлекет инвестиция тартуға қолайлы орта қалыптастыру бойынша жүйелі жұмыс жүргізіп келеді – қаржыландырудан бастап инфрақұрылымға дейін. Ел бойынша жүздеген жобаның жүзеге асуы ауыл аймақтарының дамуына серпін береді, жаңа жұмыс орындарын ашады және Қазақстанның азық-түлік қауіпсіздігін нығайтады.