John Deere енді Қостанайда: Қазақстанда ауыл шаруашылығы техникасының жергілікті өндірісі іске қосылды

Қостанай облысында John Deere брендімен ауыл шаруашылығы техникасының жергілікті өндірісі ресми түрде іске қосылды. Жаңа өндірістік желіге өздігінен жүретін, тіркемелі және аспалы техника кіреді. Бұл AGROMASH зауытының базасында құрылған Локализациялау орталығының ашылуы арқасында мүмкін болды. Аталған орталық — еліміздегі ауыл шаруашылығы техникасын шығаратын ең ірі индустриялық алаң.

Бұл жоба отандық машина жасау саласының дамуы мен ауыл шаруашылығына заманауи технологияларды енгізудегі маңызды қадам болды. Ауыл шаруашылығы техникасының жаһандық көшбасшыларының бірі — американдық John Deere компаниясының өнімін жергілікті жерде өндіру өнеркәсіп пен фермерлік қауымдастық үшін жаңа мүмкіндіктер ашады.

AGROMASH зауытының президенті Динара Шүкіжанованың айтуынша, осындай ауқымды жобаның жүзеге асуы елімізде жүргізіліп жатқан экономикалық және саяси реформалардың арқасында мүмкін болды. Ол бұл бастамалар тек жаңа жұмыс орындарын ашып, инновациялық шешімдерді енгізумен шектелмей, қазақстандық мамандардың инженерлік ойлау қабілетін қалыптастыруға да ықпал ететінін атап өтті.

Локализациялау орталығының өндірістік қуаттылығы техниканы толық циклде жинауға және техникалық қолдауға мүмкіндік береді. Жақын арада бұл фермерлерге жергілікті климат пен топыраққа бейімделген заманауи техникаға кеңірек қол жеткізуге жағдай жасап, мемлекеттік қолдау шаралары аясында тиімді сатып алу мүмкіндігін береді.

Қазақстандағы John Deere бренді бойынша ресми серіктес — Eurasia Group компаниясы. Жаңа кезең аясында компания Қазақстанда өндірілген техниканы сатуды жалғастыра отырып, сервис қызметтерін кеңейтеді және агроөнеркәсіп саласына цифрлық шешімдерді енгізеді.

Жоба өндірістік бағыттармен қатар, білім беру міндеттерін де қамтиды. Алдағы бес жыл ішінде елімізде үш заманауи сервис орталығы салынады. Бұл орталықтар агрономдар, инженерлер, механизаторлар және ауыл шаруашылығының цифрлық трансформациясына қажетті IT-мамандарын даярлайтын негізгі алаң болады. Олар еліміздің агроөнеркәсіп кешенінің тиімділігі мен технологиялық деңгейін арттыруда стратегиялық рөл атқарады.

Сонымен қатар, AGROMASH компаниясы Батыс елдерінің өндірушілерімен өнеркәсіптік кооперацияны кеңейтуді жалғастырмақ. Қазіргі уақытта Локализациялау орталығында LOVOL, DEUTZ-FAHR, КИРОВЕЦ, ГОМСЕЛЬМАШ, AMAZONE, CLAAS және басқа да әлемдік брендтердің техникалары құрастырылады. Бұл жергілікті техника үлесін едәуір арттыруға және ауыл шаруашылығы саласындағы технологиялық егемендікті қамтамасыз етуге негіз болады.

Осылайша, Қостанай облысы ауыл шаруашылығы техникасын өндіру бойынша елдегі басты кластер мәртебесін нығайтып, Орталық Азиядағы инновация мен өндірістік өсімнің негізгі орталығына айналуда.