Қазақстан мен Қытай ауыл шаруашылығы өнімдерін өзара жеткізу көлемін арттыруды талқылады

Қазақстандық делегация 8-ші Қытай астық саудасы конференциясына қатысуда. Ел делегациясын ауыл шаруашылығы вице-министрі Назгүл Хатепова бастап барды.

Қытайға жұмыс сапары аясында вице-министр ҚХР Азық-түлік және материалдық резервтер жөніндегі мемлекеттік басқармасының (NAFRA) басшысы Лю Хуаньсинмен кездесті.

Келіссөздер барысында тараптар сауда-экономикалық байланыстардың қазіргі жағдайын, өзара сауда көлемін одан әрі арттыру мүмкіндіктерін, сондай-ақ ауыл шаруашылығы өнімдерін жеткізуді ұлғайтуға бағытталған шараларды қарастырды.

Назгүл Хатепова Қытай Қазақстанның агроөнеркәсіптік кешен саласындағы негізгі стратегиялық серіктестерінің бірі болып қала беретінін атап өтті. Екі елдің географиялық жақындығы, экономикалардың бірін-бірі толықтыруы және азық-түлікке деген сұраныстың тұрақты өсуі өзара тиімді ынтымақтастықты одан әрі дамытуға негіз қалыптастырады. Қазақстан тарапы отандық өнімге тұрақты сұранысты қамтамасыз етуге және оны ҚХР нарығына жеткізудің қосымша арналарын ашуға мүмкіндік беретін жүйелі жұмысқа мүдделі.

2025 жылдың қорытындысы бойынша Қазақстан мен Қытай арасындағы агроөнеркәсіптік кешен өнімдерінің тауар айналымы 36,8%-ға өсіп, $1,97 млрд-қа жетті.

Кездесуге қатысушылар сауда көлемін одан әрі арттыру, сондай-ақ өзара жеткізілімдерді кеңейту және әртараптандыру үшін айтарлықтай әлеует бар екенін атап өтті.

Қазақстан тарапы ұзақ мерзімді ынтымақтастық тетіктерін қалыптастыруға бағытталған бірқатар бастамаларды ұсынды. Атап айтқанда, өзара саудадағы тауарлар тізбесін кеңейту және астық пен майлы дақылдарды, оның ішінде Қытайдың стратегиялық резервтерін қалыптастыру үшін сатып алу көлемін ұлғайту ұсынылды.

Келіссөздер барысында ҚХР инвестицияларын ауыл шаруашылығы өнімдерін сақтау және қайта өңдеу жобаларына тарту, сондай-ақ агрологистиканы дамыту мүмкіндіктеріне ерекше назар аударылды.

Қытай тарапының өкілдері Қазақстанмен агроөнеркәсіптік кешен саласындағы өзара іс-қимылды одан әрі нығайтудың және белгіленген бағыттар бойынша бірлескен жұмысты жалғастырудың маңыздылығын атап өтті.

Келіссөздер қорытындысы бойынша тараптар ұсынылған бастамаларды пысықтауды жалғастыруға және Қазақстан мен Қытайдың бейінді мемлекеттік органдары мен бизнес өкілдері арасындағы өзара іс-қимылды жандандыруға келісті.

Сапар аясында Назгүл Хатепова Хунань провинциясының губернаторы Мао Вэйминмен де кездесті.

Кездесуде Қазақстан мен Хунань провинциясы арасындағы практикалық ынтымақтастықты дамытуға негізгі назар аударылды. Азық-түлік қауіпсіздігі саласындағы әріптестікті кеңейтумен қатар, Мао Вэймин бірлескен ғылыми-техникалық ынтымақтастықты және тәжірибе алмасуды жандандыруды ұсынды.