Қазақстан маусым айының соңына дейін 150 мың тонна картопты кедендік бажсыз импорттай алады

Еуразиялық экономикалық комиссия (ЕЭК) Кеңесі Одаққа мүше мемлекеттерге картоп импорттауға кедендік жеңілдік беру туралы шешім қабылдады. ЕЭК баспасөз қызметінің хабарлауынша, Қазақстан 2025 жылғы 30 маусымға дейін 150 мың тоннаға дейін картопты нөлдік кедендік баж мөлшерлемесімен әкелу құқығына ие болады. Бұл квота бойынша әкелінетін өнім тек ішкі нарықта бөлшек саудада сату үшін пайдаланылады.

Сонымен қатар, дәл осындай көлем — 150 мың тонна — Ресейге де бөлінді. Бұл елде жеңілдік мерзімі 2025 жылғы 31 шілдеге дейін ұзартылып, әкелінетін картоп тағам өнеркәсібіне де, бөлшек саудаға да бағытталуы мүмкін.

ЕЭК Сауда министрі Андрей Слепнёв бұл кедендік шара Қазақстан мен Ресейдегі картоп бағасының тұрақтылығын қамтамасыз етуге бағытталғанын айтты. Қаулы ресми жарияланған күннен бастап 10 күнтізбелік күннен кейін күшіне енеді.

Қазақстан Ұлттық статистика бюросының деректері бойынша, 20 мамырға дейін картоптың орташа бағасы жыл басынан бері 40,9%-ға, ал бір жыл ішінде 72,3%-ға өскен. Аталған күнге қарай республика бойынша орташа баға 1 кг үшін 269 теңгеге жеткен, ал жаңа піскен картоптың бағасы 1200 теңгеден асқан.

Бұған дейін, қаңтар айының соңында, картоп экспортының қарқынды өсуі мен бағаның күрт көтерілуіне байланысты, Қазақстан ЕАЭО елдерінен басқа елдерге картоп экспорттауға алты айлық тыйым салған болатын. Дегенмен, Россельхознадзордың дерегінше, жыл басынан 7 мамырға дейін Ресейге Қазақстаннан 7000 тонна картоп жөнелтілген, бұл өткен жылдың сәйкес кезеңімен салыстырғанда 15 есе көп (сол кезде 448 тонна болған).

Ішкі нарықтағы тапшылықты жою мақсатында Ауыл шаруашылығы министрлігі ұйымдастырылған шаруашылықтардағы картоп егіс алқаптарын ұлғайтуды жоспарлап отыр. Көп өнім алу арқылы нарықтағы ұсынысты тұрақтандырып, келесі маусымда бағаның өсуін тежеу көзделуде.