29.09.2026, 00:44
Қазақстан Австрияға агроөнім экспортын арттыруды жоспарлап отыр
Австрия тарапы қазақстандық өсімдік майын сатып алуға және астық өнімдерін өңдеуді дамытуға қызығушылық білдірді
Қазақстан Австрия нарығына ауыл шаруашылығы өнімдерінің экспортын ұлғайту мүмкіндіктерін қарастыруда. Перспективалы тауарлар тізіміне астық, ұн, ет, құс еті, балық, бал, зығыр тұқымы және органикалық өнімдер кіреді.
Жалпы алғанда, Қазақстанның өңделген өнімдерін Австрияға жеткізуді арттыру әлеуеті 100 тауар позициясы бойынша 637,5 млн долларға бағаланады. Бұл металлургия мен мұнай-химия өнімдерінен бастап азық-түлік пен машина жасау өнімдеріне дейінгі әртүрлі салалардың тауарларын қамтиды.
Сауда-экономикалық ынтымақтастықты кеңейту перспективаларын Қазақстанның сауда және интеграция вице-министрі Айдар Әбілдабеков Астанада «Қазақстан – Австрия» парламенттік достық тобының төрағасы Маркус Хофер бастаған австриялық делегациямен кездесу барысында талқылады.
Келіссөздер барысында Австрия тарапы Қазақстанда өндірілген өсімдік майын сатып алуға қызығушылық білдірді. Сонымен қатар астық өнімдерін өндіру және өңдеу де қызығушылық тудыратын бағыттардың бірі болып отыр.
Тараптар сондай-ақ қолда бар сауда әлеуетін нақты жеткізілімдерге, инвестицияларға және бірлескен жобаларға айналдыру мүмкіндіктерін талқылады.
Қазіргі уақытта екі ел арасындағы өзара сауда көлемі қолда бар мүмкіндіктерді толық көрсетпейді. 2026 жылғы қаңтар–шілде айларында Қазақстан мен Австрия арасындағы тауар айналымы 159,9 млн долларды құрады.
Бұл ретте қазақстандық өнім экспорты 2,4 есе өсіп, 7,64 млн долларға жетті. Қазақстан жеткізілімдерді одан әрі арттырудың перспективалы бағыттарының бірі ретінде қосылған құны жоғары өнімдерді қарастырады.
Айдар Әбілдабеков атап өткендей, міндет өзара сауда көлемін ұлғайтумен ғана шектелмейді, сонымен қатар қазақстандық тауарлардың Еуропа нарығындағы үлесін кеңейтуді көздейді. Оның айтуынша, осы бағытта қазірдің өзінде жұмыс істей алатын нақты тауар позициялары мен компаниялар анықталған.
Келіссөздердің жеке тақырыбы екі ел арасындағы көлік-логистикалық ынтымақтастықты дамыту болды. Қазақстан мен Австрия теміржол көлігімен және Каспий теңізі арқылы жүк тасымалдау көлемін ұлғайтуға мүдделі.
Тараптар Транскаспий халықаралық көлік бағытының әлеуетін кеңейту, логистикалық инфрақұрылымды дамыту және жүк тасымалының тиімділігін арттыру бойынша бірлескен жұмысты жалғастыруға ниетті.
