15.07.2025, 10:55
Қазақстан 13 жыл ішіндегі ең жоғары көрсеткішке жетіп, 9 млн тонна астық экспорттады
Астық жеткізілімі 35%-ға өсіп, 2012 жылдан бергі рекордты жаңартты
2025 жылдың алғашқы бес айында Қазақстан астығы мен ұнының экспорты айтарлықтай артты — жалпы жеткізілім көлемі өткен жылдың сәйкес кезеңімен салыстырғанда 35,2% өсіп, 11,8 млн тоннаға жетті. Оның ішінде 9 млн тоннасы астық экспортына тиесілі, бұл соңғы 13 жылдағы ең жоғары көрсеткіш болып отыр.
Бұл туралы Премьер-Министрдің орынбасары – Ұлттық экономика министрі Серік Жұманғарин Үкімет отырысында мәлімдеді. Оның айтуынша, экспорт көлемінің өсуі көлік және сауда қызметтері сияқты байланысты салаларға оң әсерін тигізген.
Биылғы жылы Қазақстан астығы мен ұнының негізгі нарықтары Өзбекстан, Тәжікстан, Иран және Әзербайжан елдері болды. Бұл елдерге тұрақты жеткізілім Қазақстанның өңірлік астық экспорттаушы ретіндегі рөлін айқындай түседі.
Серік Жұманғариннің айтуынша, қаңтар–мамыр аралығында еліміздің сыртқы сауда айналымы 53,5 млрд АҚШ долларын құрады. Оның ішінде 29,8 млрд доллары экспортқа, оның 10,2 млрд доллары өңделген өнім экспортына тиесілі. Импорт көлемі 23,8 млрд долларды құрады.
Өңдеу өнеркәсібінде де оң серпін байқалды — жалпы өндіріс көлемі 5,5% өсті. Бұл өсім келесі негізгі салалардағы өндірістің артуымен байланысты:
• Машина жасау — 11,1%
• Азық-түлік өндірісі — 10%
• Мұнай өңдеу — 9,6%
• Металл бұйымдары — 14,6%
• Құрылыс материалдары — 8,6%
• Химия өнімдері — 7%
Сарапшылардың пікірінше, бұл көрсеткіштер сыртқы нарықтағы сұраныстың артуымен, логистикалық бағыттардың жақсаруы және елдің өнеркәсіптік базасының кеңеюімен тікелей байланысты.
