18.06.2025, 18:27
Қытай Қазақстанға 24 млрд доллардан астам инвестиция құймақ: басымдық – агроөңдеу мен өндірісті локализациялау
Қытай Қазақстанның агроөнеркәсіптік саласына миллиардтаған қаржы құймақ
«Орталық Азия – Қытай» атты Индустриялық және инвестициялық ынтымақтастықтың Екінші форумының аясында Қазақстан мен Қытайдың жетекші компаниялары 58 коммерциялық келісімге қол қойды. Жалпы инвестиция көлемі 24 миллиард АҚШ долларынан асты. Бұл қаражаттың елеулі бөлігі агроөнеркәсіптік кешенге, өңдеу өнеркәсібіне және фермерлер үшін тұрақты өткізу арналарына бағытталмақ.
Fufeng Group жобасы: Жамбыл облысында 320 млн долларлық жүгері өңдеу зауыты
Fufeng Group қытайлық компаниясымен жасалған инвестициялық келісім — АӨК саласындағы негізгі жобалардың бірі. 320 миллион доллар көлемінде инвестиция тарту көзделіп отыр. ҚР Ауыл шаруашылығы министрлігінің хабарлауынша, Жамбыл облысындағы зауыт жылына 1 миллион тоннаға дейін жүгері өңдей алады. Онда лизин және аминқышқылдар сынды жоғары қосылған құны бар өнімдер шығарылады.
Жобаның алғашқы кезеңінде 2025 жылға 300 мың тонна жүгеріге оффтейк-келісімдер жасалған. Кәсіпорында 1500 жұмыс орны ашылып, өңір фермерлері ұзақ мерзімді келісімшарттар арқылы тұрақты өткізу нарығына ие болады.
Xinjiang Lihua Group: Түркістан облысында мақта кластері
Xinjiang Lihua Group Co., Ltd. компаниясы 420 миллион доллар инвестиция салып, Түркістан облысында мақтаны толық өңдейтін өндірістік кластер салмақ. Жобаға мақта өсіруден бастап дайын тоқыма бұйымдарын шығаруға дейінгі барлық кезең кіреді.
Компания ішкі нарықты қамтып, экспортқа – әсіресе ТМД мен Азия елдеріне бағытталмақ. 10 өндірістік кәсіпорын салу және ауылдық жерлерде 4000-нан астам жұмыс орнын ашу көзделуде. Жобаға жергілікті фермерлерді шартты егіншілік арқылы тарту жоспарланып отыр.
Dalian Hesheng Holdings: Ақмола облысында 650 млн долларлық астықты терең өңдеу зауыты
Dalian Hesheng Holdings компаниясы 650 миллион доллар инвестиция салып, Ақмола облысында астықты терең өңдеу кешенін салуға ниетті. Мұнда глютен, крахмал және басқа да жоғары қосылған құнды өнімдер өндірілмек. Жергілікті аграрийлермен ұзақ мерзімді келісімшарттар жасасу көзделуде.
Жоба агроөңдеу саласының дамуына, экспорттық әлеуеттің артуына және азық-түлік қауіпсіздігіне оң әсер етеді.
Qingdao Wanlin Food: көкөніс өңдеу зауыты экспортқа бағытталмақ
Қазақстан Республикасы Сыртқы істер министрлігінің Инвестициялар комитеті Qingdao Wanlin Food Corporation компаниясымен 89 миллион долларлық инвестициялық келісімге қол қойды. Бұл жоба аясында пиязды сусыздандыру және көкөністерді терең өңдеу зауыты салынады.
Өндіріс Қытай, АҚШ және Еуропа нарықтарына экспортқа бағытталады. Компания жергілікті фермерлермен шикізатты жеткізу бойынша ынтымақтастық орнатып үлгерді. Зауытта шамамен 300 жұмыс орны ашылады.
