30.05.2025, 12:50
Қазақстан Қырғызстанға транзиттік астық тасымалына арналған тарифті төмендетеді
Жаңа тариф мөлшерлемесі агроэкспортты қолжетімді етіп, ЕАЭО аясындағы экономикалық ықпалдастықты күшейтеді
2025 жылдың 8 маусымынан бастап Қазақстан аумағы арқылы Қырғыз Республикасына теміржол транзиті арқылы тасымалданатын астық жүктеріне арналған тариф 45%-ға төмендеп, белгіленген мөлшерлеменің 55%-ын құрайтын болады. Бұл туралы «Қырғыз темір жолу» мемлекеттік кәсіпорны хабарлады, сілтеме ретінде «Қазақстан темір жолы» ұлттық компаниясы» АҚ-ның 2025 жылғы 23 мамырдағы №9-Ц бұйрығы келтірілген.
Аталған шешім биылғы сәуір айында өткен ведомствоаралық келіссөздердің нәтижесінде қабылданды. Кездесу барысында «Қырғыз темір жолу» МК бас директоры Аманбек Сакиев пен «ҚТЖ» ҰК» АҚ басқарма төрағасы Нұрлан Сауранбаев логистикалық шығындардың өсуі және ЕАЭО елдері арасындағы тұрақты сауда айналымын қамтамасыз ету аясында тарифтік саясатты оңтайландыру мәселелерін талқылады.
Нәтижесінде Қырғызстаннан және Қырғызстанға қарай Қазақстан Республикасы аумағы арқылы өтетін транзиттік тасымалдау кезінде астық дақылдарына бірыңғай тариф мөлшерлемесін төмендету туралы келісімге қол жеткізілді. Жаңа мөлшерлеме Еуразиялық экономикалық одақ аясындағы ауылшаруашылық өнімдерінің өзара саудасы мен тасымалын реттейтін келісім аясында қолданылады.
Тарифтің төмендеуі қазақстандық және қырғызстандық астық экспорттаушылар үшін елеулі жеңілдік болып табылады. Логистикалық шығындардың азаюы өнімнің өңірлік нарықтардағы бәсекеге қабілеттілігін арттырып, ауыл шаруашылығы өндірушілеріне жеткізу кестесін икемді жоспарлауға мүмкіндік береді. Сонымен қатар, бұл шара ЕАЭО елдері арасындағы экономикалық интеграцияны тереңдетуге ықпал етіп, инфрақұрылымдық операторлардың күрделі экономикалық жағдайда бизнестің қажеттіліктеріне бейімделуге әзір екенін көрсетеді.