11.03.2026, 12:10
Қазақстанның ҰАҒБО алқаптарында майлы дақылдардың егіс көлемі кеңейтіледі
Егіс алқаптарының құрылымы агроклиматтық жағдайлар мен ғылыми негізделген ауыспалы егіс талаптарын ескере отырып түзетілді
Ұлттық аграрлық ғылыми-білім беру орталығының (ҰАҒБО) құрамына кіретін ауыл шаруашылығы тәжірибе станциялары мен шаруашылықтар 2026 жылғы егіс науқанына жоспарлы дайындық жұмыстарын жүргізуде. Биылғы маусымда егіс жұмыстары 110 581 гектар аумақта жүргізіледі деп жоспарланып отыр, бұл өткен жылғы көрсеткіштен 4,6%-ға жоғары.
Ауыл шаруашылығы министрлігінің мәліметінше, 2026 жылға арналған егіс алқаптарының құрылымы агроклиматтық жағдайлар мен ғылыми негізделген ауыспалы егіс талаптарын ескере отырып қалыптастырылған. Атап айтқанда, олардың жоғары нарықтық құнына байланысты майлы дақылдар егістігін 12,3%-ға ұлғайту қарастырылған. Сонымен қатар мал шаруашылығы саласын қолдау мақсатында мал азықтық дақылдар егісі 8,9%-ға кеңейтіледі.
ҰАҒБО-ға қарасты ауыл шаруашылығы ұйымдарының жалпы егістік жер қоры 143 690 гектарды құрайды. Ғылыми негізделген егіншілік құрылымы аясында 18 456 гектар жер сүрі алқаптарға бөлінеді. Сүрі жерлерді сақтау ылғал жинауға, арамшөптердің таралуын азайтуға және топырақ құнарлылығын сақтауға мүмкіндік береді.
Егіс науқанын сапалы тұқым материалымен қамтамасыз етуге ерекше назар аударылуда. Қазіргі уақытта 236 ауыл шаруашылығы дақылының сорты пайдаланылуда, ал тұқымдық егіс алқаптарының көлемі 40 875 гектарды құрайды. Тұқымның жалпы өнімі 64 853 тонна деңгейінде бағалануда.
Тазалау және өңдеу нәтижесінде шамамен 38 мың тонна кондициялық тұқым алынған. 2026 жылы бұл көрсеткішті 43 119 тоннаға дейін арттыру жоспарланып отыр.
Егіс науқанына дайындық аясында фитосанитарлық тәуекелдерді төмендетуге бағытталған кешенді шаралар да қарастырылған.
Жалпы алғанда, 2026 жылғы егіс науқанына дайындық жүйесі аграрлық өндірістің технологиялық тұрақтылығын арттыруға, отандық селекцияны дамытуға және ғылыми негізделген агротехнологияларды енгізуге бағытталған. Бұл жер ресурстарын тиімді пайдалануға, өнімділікті тұрақтандыруға және ауыл шаруашылығы өндірісінің экономикалық тиімділігін арттыруға мүмкіндік береді.
