17.07.2025, 19:33
АҚШ енгізген баж салығына байланысты Қазақстан терең өңдеуге арналған бидай сатып алуды субсидиялайды
АҚШ шектеулеріне байланысты Қазақстан астық өңдеушілерді қолдайды
1 тамыздан бастап АҚШ Қазақстанда өндірілген крахмал мен клейковинаға 25% көлемінде баж салығын енгізеді. Бұл шешім отандық терең өңдеу кәсіпорындарының негізгі экспорт нарықтарының біріне қолжетімділігін едәуір шектейді.
Осыған байланысты және сыртқы экономикалық жағдайдың өзгеруіне жауап ретінде Ауыл шаруашылығы министрлігі ауыл шаруашылығы өнімдерін терең өңдеуге сатып алу шығындарын субсидиялау қағидаларына өзгерістер енгізу туралы бастама көтерді. Аталған қағидалар 2014 жылдан бері қолданыста.
Ұсынылып отырған түзетулерге сәйкес, бұған дейін субсидияланбаған бидайды клейковина өндіру үшін сатып алу шығындары енді субсидияланатын болады. Министрліктің мәліметінше, терең өңдеу кәсіпорындары бірқатар күрделі қиындықтарға тап болып отыр: клейковинаның 60%-дан астамы бұрын АҚШ-қа экспортталған, ал жаңа шектеулер бұл өнімнің бәсекеге қабілеттілігін айтарлықтай төмендетті.
Министрліктің бұл бастамасы Мемлекет басшысы төртінші Ұлттық құрылтайда қойған міндетпен ұштасады — алдағы онжылдықта Қазақстанды терең өңделген астық өнімдерінің әлемдік өндірушілері мен экспорттаушыларының ондығына енгізу.
Мемлекеттік қолдау шараларын кеңейту қазақстандық өнімдердің жаңа нарықтарға шығуына және жаһандық жеткізушілер қатарындағы орнын нығайтуға ықпал етеді деп күтілуде.
Аталған бұйрық жобасы 25 шілдеге дейін көпшілік талқылауына ұсынылған.
