15.06.2026, 23:54
Қазгидромет 2026 жылғы күздік бидай өнімінің болжамын жариялады
Күздік дақылдар өсірілетін өңірлердің басым бөлігінде өнімділік көпжылдық орташа көрсеткіштер деңгейінде болады деп күтілуде
Қазгидромет алдағы кезеңге арналған ауа райы болжамы мен қалыптасқан агрометеорологиялық жағдайларды ескере отырып әзірленген күздік бидай өнімділігінің соңғы болжамын жариялады.
Мамандардың есептеулеріне сәйкес, Алматы, Жамбыл, Түркістан облыстарында және Жетісу облысында күздік бидайдың өнімділігі негізінен көпжылдық орташа көрсеткіштер деңгейінде болжанып отыр және гектарына 10,5–22,8 центнер аралығында болады.
Түркістан облысының Қазығұрт ауданында күздік бидай өнімділігі көпжылдық орташа деңгейден жоғары болады деп күтілуде. Мұнда өнімділік гектарына 21,7–23,7 центнерге жетуі мүмкін. Өңірдің қалған аудандарында көрсеткіштер қалыпты деңгейде болады деп болжануда.
Синоптиктердің мәліметінше, маусым айының алғашқы онкүндігінде Қазақстанның оңтүстігі мен оңтүстік-шығысында күздік бидай дәнінің толысуына негізінен қолайлы жағдайлар қалыптасты. Ауа температурасы климаттық нормадан 2–5°С жоғары болды. Күздік дақылдар өсірілетін аудандардың басым бөлігінде жауын-шашын мөлшері нормадан төмен болды, тек Жетісу облысының жекелеген аудандарында жауын-шашын көлемі қалыпты мөлшерден жоғары тіркелді.
Алматы облысында күздік бидай алқаптарындағы ең төменгі ауа температурасы +10...+12°С аралығында болды. Жауын-шашын мөлшері 5–9 мм құрап, бұл климаттық норманың 31–52%-ына сәйкес келді. Күздік дәнді дақылдар егістіктерінде гүлдену мен сүттену кезеңдері байқалуда. Өсімдіктердің жағдайы негізінен жақсы және өте жақсы деп бағаланып отыр, ал олардың биіктігі 53–93 см аралығында.
Жетісу облысында күздік дәнді дақылдар гүлдену кезеңінен балауызданып пісу кезеңіне дейінгі даму сатысында тұр. Ал Кербұлақ ауданындағы Шоқан агробекеті маңында масақтану кезеңі тіркелді. Егістіктердің жағдайы негізінен жақсы.
Жамбыл облысында күздік бидай алқаптарындағы ең төменгі ауа температурасы +8...+16°С аралығында болды. Жауын-шашын мөлшері 1–4 мм құрап, бұл норманың 18–78%-ына сәйкес келді. Өсімдіктердің жағдайы негізінен жақсы және өте жақсы деп бағалануда.
Түркістан облысында күздік бидай мен күздік арпаның жағдайы да негізінен жақсы. Бұл болжанған көрсеткіштер деңгейінде өнім қалыптастыруға қолайлы алғышарттар жасап отыр.
