25.02.2026, 05:39
Егіс науқанына арналған дизель отынының жеңілдетілген бағасы нарықтан 15%-ға төмен деңгейде бекітілді
Шешім көктемгі дала жұмыстарын уақтылы жүргізуге бағытталған
Қазақстанда көктемгі дала жұмыстарын уақытылы әрі сапалы өткізу үшін ауыл шаруашылығы тауарын өндірушілерге арналған дизель отынының жеңілдетілген бағасы бекітілді. Отын құны нарықтық бағадан 15%-ға төмен деңгейде белгіленді.
Премьер-министр Олжас Бектенов Үкімет отырысында Энергетика министрлігіне егіс науқанына арналған дизель отынының шекті жеңілдетілген бағасын жедел түрде бекітуді тапсырды.
Энергетика министрі Ерлан Аккенженов тиісті шешім қабылданғанын және аграрийлер үшін шекті баға нарықтық көрсеткіштерден 15% жеңілдікпен белгіленгенін хабарлады.
Ведомство мәліметінше, ауыл шаруашылығы тауарын өндірушілердің электрондық өтінімдері негізінде егіс жұмыстарына арналған жеңілдетілген дизель отынының көлемі 402 мың тонна болып қалыптастырылды.
