24.02.2026, 04:56
2026–2028 жылдары Қазақстанда агробизнеске шамамен 2 трлн теңге бағытталады
Сонымен қатар тауарға бағытталған субсидиялардан жеңілдетілген кредиттеу тетіктеріне кезең-кезеңімен көшу жоспарланған
Қазақстанда 2026–2028 жылдары агроөнеркәсіптік кешенді қолдауға шамамен 2 трлн теңге бағыттау жоспарлануда. Қаражат жалпы сипаттағы трансферттер аясында көзделген. Бұл туралы ҚР Премьер-Министрі Олжас Бектенов депутаттық сауалға жауап беру барысында мәлімдеді.
Оның айтуынша, қаржыландыру қолданыстағы субсидиялау шараларын жүзеге асыруға жұмсалады, сондай-ақ қаражаттың бір бөлігі өткен жылдары жинақталған берешекті кезең-кезеңімен азайтуға бағытталмақ.
Үкімет басшысы қазіргі уақытта ауыл шаруашылығы тауарын өндірушілер алдындағы субсидиялар бойынша жалпы берешек көлемі шамамен 341 млрд теңгені құрайтынын нақтылады. Оның ішінде 169 млрд теңге кредиттік міндеттемелер бойынша пайыздық мөлшерлемелерді субсидиялауға тиесілі.
Сондай-ақ, қажетті бюджеттік мүмкіндіктер болған жағдайда, қарызды қысқарту мәселесі бекітілген бюджет қаражатын және жергілікті бюджеттердің кіріс бөлігін қайта бөлу есебінен шешілетінін атап өтті.
Бұдан бөлек, Премьер-Министр тауарға спецификалық субсидиялардан жеңілдетілген кредиттеу тетіктеріне кезең-кезеңімен көшу жоспарланып отырғанын еске салды. АӨК-ті қолдаудың жаңа моделіне толық көшу 2029 жылғы 1 қаңтарға дейін аяқталуы тиіс.
