17.03.2026, 05:23
Экспортты жеделдету бағдарламасына қатысу үшін өтінім қабылдау басталды
Бағдарлама қатысушылары өнімдерін сыртқы нарықтарға ілгерілету бойынша қолдау алады
«QazTrade» сауда саясатын дамыту орталығы» АҚ 2026 жылға арналған Экспортты жеделдету бағдарламасына қатысу үшін қазақстандық кәсіпорындардан өтінім қабылдау басталғанын хабарлады.
Өтінімдерді 2026 жылғы 16 наурыз бен 16 сәуір аралығында тапсыруға болады.
Бағдарлама, ең алдымен, дайын өнімі мен өндірістік қуаты бар, бірақ сыртқы нарықтарға жүйелі түрде шығу үшін кәсіби қолдауды қажет ететін шағын және орта бизнес өкілдеріне арналған.
Акселерациялық бағдарлама аясында әлеуетті шетелдік нарықтарға талдау жүргізіліп, компаниялар үшін жеке экспорттық стратегия әзірленеді. Сондай-ақ қатысушыларға өнімді мақсатты елдердің талаптарына бейімдеуге, коммерциялық ұсыныстар дайындауға және экспорттық келісімшарттар жасалғанға дейін келіссөздерді сүйемелдеуге көмек көрсетіледі.
Бағдарламаның негізгі бағыттарының бірі – шетелдік сатып алушылармен B2B-кездесулер ұйымдастыру, сондай-ақ халықаралық көрмелер мен шетелдік бизнес-миссияларға қатысу.
Бағдарламаға экономиканың түрлі салаларындағы кәсіпорындар шақырылады. Олардың қатарында агроөнеркәсіптік кешен, тамақ өнеркәсібі, машина жасау, фармацевтика, химия және мұнай-химия саласы, құрылыс материалдарын өндіру, жеңіл өнеркәсіп, IT-секторы және қызмет көрсету саласы бар.
Қатысушылар конкурстық негізде іріктеледі. Жыл сайын бағдарламаға шамамен 120 компания таңдалады.
QazTrade мәліметінше, бағдарламаға қатысушылар миллиондаған доллар көлемінде экспорттық келісімшарттар жасайды, ал кейбір жағдайларда жеткізілім көлемі 20–29 млн долларға дейін жетеді.
QazTrade-2026 экспортты жеделдету бағдарламасына өтінім қабылдау онлайн форматта жүргізіледі.
