22.01.2026, 17:08
Жаңа шаралар пакеті: Қазақстан ішкі және сыртқы нарықтарда өндірушілерді қолдайды
Қазақстан отандық өндірушілерді қорғауды күшейтіп, өнімді ішкі және экспорт нарықтарында ілгерілетеді
Алдағы екі апта ішінде Сауда және интеграция министрлігі Ауыл шаруашылығы министрлігімен бірлесіп, қазақстандық өнімді қорғау және ілгерілету бойынша жүйелі шаралар пакетін ұсынатын болады. Тиісті тапсырманы Премьер-Министр Олжас Бектенов беріп, отандық өндірушілердің мүдделерін ел ішінде де, экспорттық бағыттарда да қорғауды басымдық ретінде белгіледі.
Үкіметтің негізгі назары Еуразиялық экономикалық одақ аясындағы әділетсіз сауда тәсілдерімен күреске ауысып отыр. Үкімет басшысы бизнес тарапынан бәсекелестіктің тең емес шарттарына қатысты шағымдардың жиілеуі жедел араласуды талап ететінін атап өтті. Үкіметтің ұстанымы — қазақстандық тауарлардың нарықтан ығыстырылуына жол бермейтін әділ мүдделер теңгерімін қалыптастыру.
Қойылған міндеттерді орындау үшін салалық ведомстволарға (СИМ және АШМ) отандық тауарлардың дүкен сөрелерінде тиімді орнығуына және сыртқы нарықтарға шығуына көмектесетін тетіктерді әзірлеу тапсырылды. Бұл ретте ретсіз шараларды болдырмайтын және агроөнеркәсіптік кешеннің ұзақ мерзімді өсуіне берік негіз қалыптастыратын жүйелі қолдау алгоритмдерін құру туралы сөз болып отыр.
Аталған қадамдар Мемлекет басшысының тапсырмаларын тікелей орындау болып табылады. Бұған дейін Ұлттық құрылтай отырысында Қасым-Жомарт Тоқаев Қазақстанның тамақ өнеркәсібінің осал тұстарына назар аударған болатын. Президент отандық ауыл шаруашылығы өнімдерін қайта өңдеушілер ЕАЭО елдерінен келетін импорттың айтарлықтай қысымына тап болып отырғанын, ал бұл импорт көбіне экспорттаушы елдердегі ауқымды мемлекеттік субсидиялар есебінен қолдау табатынын атап өтті.
Ақпан айының басына қарай Үкімет арзан импорттың әсерін азайтуға және қатаң бәсекелестік жағдайында отандық өндірісті дамытуға жағдай жасайтын нақты іс-қимыл жоспарын ұсынуы тиіс.
