25.02.2026, 06:15
Егіс науқанына арналған ерте қаржыландыру көлемі 200 млрд теңгеден асты
Қаражат аграрийлерге ЖЖМ, тыңайтқыштар мен тұқымдарды алдын ала сатып алуға мүмкіндік береді
2026 жылғы егіс науқанына ерте қолдау көрсету бағдарламасы аясында 1870-тен астам ауыл шаруашылығы тауарын өндіруші қаржыландыру алды. Өтінімдерді қабылдау 2025 жылдың қазан айында басталды, ал аграрийлер үшін түпкілікті сыйақы мөлшерлемесі жылдық 5% деңгейінде белгіленді.
Қазіргі уақытта жалпы сомасы 312,4 млрд теңгені құрайтын 2429 ауыл шаруашылығы тауарын өндірушіден тұратын пул қалыптастырылды. Оның ішінде 1879 өтінім 200 млрд теңге сомасына мақұлданып, қаржыландырылды, бұл 2,4 млн гектар егіс алқабын қамтуға мүмкіндік берді.
Сонымен қатар «Даму» қоры арқылы несиелерді кепілдендіру тетігі іске асырылуда, ол қарыз сомасының 85%-ына дейін кепілдік беруді көздейді. Осы құрал аясында 86 млрд теңге сомасына 526 кепілдік берілді.
«Кең дала 2» бағдарламасы бойынша өтінімдерді қабылдау 1 қазанда Мемлекет басшысының көктемгі дала жұмыстарын уақтылы және сапалы жүргізуді қамтамасыз ету жөніндегі тапсырмасын орындау мақсатында басталды.
Ерте қаржыландыру аграрийлерге 2026 жылғы егіс науқанына алдын ала дайындалуға мүмкіндік береді. Тартылған қаражат тиімді бағамен жанар-жағармай материалдарын сатып алуға, минералдық тыңайтқыштар алуға, ауыл шаруашылығы техникасын жөндеуге және қажетті тұқым қорын қалыптастыруға бағытталады.
Жеңілдетілген қаржыландыру көктемгі дала жұмыстарын дайындау және өткізуге, сондай-ақ егін жинау науқаны мен маусымдық шығындарды жабуға қолжетімді. Қаражат Аграрлық несие корпорациясының филиалдық желісі және серіктес қаржы институттары арқылы ел аумағында беріледі.
