Қазақстанда дайындалған жемшөп көлемі 33 млн тоннадан асты

Қазақстанда мал шаруашылығы қожалықтарын алдағы қысқы қорада ұстау кезеңіне қажетті жемшөппен қамтамасыз ету мақсатында жемшөп дайындау науқаны жалғасуда. Өңірлік әкімдіктердің жедел ақпараты бойынша, бүгінгі таңда елде әртүрлі жемшөптің 33,1 млн тоннасы дайындалды. Бұл жоспарланған көлемнің шамамен 80%-ын құрайды.

Қалыптастырылған қордың негізгі бөлігін шөп құрайды — 25,3 млн тонна дайындалды. Сонымен қатар ауыл шаруашылығы тауарын өндірушілер 2,5 млн тонна сабан, 2,3 млн тонна пішендеме, 1,6 млн тонна құнарландырылған жем және 1,4 млн тонна сүрлем дайындады.

Жемшөптің ең көп көлемі Түркістан облысында дайындалды — 5,02 млн тонна. Жамбыл облысында бұл көрсеткіш 3,25 млн тоннаға, Алматы облысында 3,11 млн тоннаға жетті. Бұдан бөлек, Батыс Қазақстан облысында 2,58 млн тонна, ал Солтүстік Қазақстан облысында 2,43 млн тонна жемшөп дайындалды.

Алдағы қысқы қорада ұстау кезеңін тұрақты өткізу және сақтандыру қорын қалыптастыру үшін «Азық-түлік келісімшарт корпорациясы» ҰК» АҚ 201,3 мың тонна астық көлемінде жемдік қор қалыптастырды.

Қажет болған жағдайда бұл резерв ауыл шаруашылығы тауарын өндірушілерді қажетті жемшөп ресурстарымен қамтамасыз ету үшін пайдаланылатын болады.

Қазақстанның барлық өңірлерінде жемшөп дайындау жұмыстары жалғасуда.

Ауыл шаруашылығы министрлігі өңірлік әкімдіктермен бірлесіп жемшөп дайындау науқанының барысын тұрақты түрде бақылап отыр. Жағдайға мониторинг жүргізу және резервтерді уақтылы қалыптастыру мал шаруашылығы қожалықтарын қажетті жемшөп базасымен қамтамасыз етуге және алдағы қысқы қорада ұстау кезеңін тұрақты өткізуге бағытталған.