28.05.2026, 00:54
Қазақстан мен Ресей арасындағы теміржол тасымалының көлемі 3,5%-ға өсті
Жүк ағынының оң динамикасы транзиттік бағыттардың дамуы мен үкіметаралық келісімдердің арқасында сақталуда
Қазақстан мен Ресей арасындағы теміржол жүк тасымалы өсуді жалғастыруда. 2025 жылдың қорытындысы бойынша екі ел арасындағы жалпы жүк тасымалы көлемі 92,1 млн тоннаға жетіп, 2024 жылғы көрсеткіштен 3,5%-ға жоғары болды.
ҚТЖ баспасөз қызметінің хабарлауынша, өсімнің негізгі бөлігін транзиттік тасымалдар қамтамасыз етті. Ресей жүктерінің Қазақстан аумағы арқылы экспорты 16,1%-ға артып, 17,3 млн тоннаны құрады. Өз кезегінде, Қазақстан жүктерінің Ресей арқылы транзиттік экспорты 20,4%-ға өсіп, 21,5 млн тоннаға жетті.
Ұлттық компанияның мәліметінше, жүк ағындарының артуына әсер еткен негізгі факторлардың бірі — 2025 жылдың қараша айында Мәскеуде қол қойылған теміржол көлігімен транзиттік тасымалдар жөніндегі үкіметаралық келісім.
«Қабылданған шаралардың тиімділігін 2026 жылдың алғашқы төрт айының нәтижелері де дәлелдейді. Көмір, қара металл және тыңайтқыштарды қоса алғанда, Қазақстан жүктерінің Ресей арқылы транзиттік экспорты 70 мың тоннаға артып, 7 млн тоннаға жетті. Қазақстанға және оның аумағы арқылы өтетін ресейлік жүктердің, соның ішінде мұнай өнімдері, қара металл, астық және азық-түлік жүктерінің көлемі 12 млн тоннадан асып, шамамен 20%-ға өсті», — деп хабарлады ҚТЖ.
