12.05.2026, 23:58
Қазақстанда егіс алқабы 23,8 млн гектардан асады
Елде егіс құрылымын әртараптандыру және су ресурстарын оңтайландыру жұмыстары жалғасуда
Қазақстанда 2026 жылы жалпы егіс алқабы 23,8 млн гектардан асады. Көктемгі егіс жұмыстарының барысы туралы Үкімет отырысында ауыл шаруашылығы вице-министрі Азат Сұлтанов мәлімдеді.
Оның айтуынша, биылғы маусымда ауыл шаруашылығы дақылдарының егіс көлемі өткен жылмен салыстырғанда 180 мың гектарға ұлғайған. Майлы дақылдардың егіс көлемі 4 млн гектардан, мал азықтық дақылдар 3,3 млн гектардан асады. Өңдеу кәсіпорындарын шикізатпен қамтамасыз ету мақсатында жүгері алқабы 265 мың гектарға дейін кеңейтілді, ал ұйымдасқан шаруашылықтардағы картоп егісі 10 мың гектарға ұлғаяды.
Вице-министрдің айтуынша, Мемлекет басшысының тапсырмасы аясында егіс құрылымын әртараптандыру жұмыстары жалғасуда. Биыл бидай алқабы 125 мың гектарға қысқарып, 12,1 млн гектарды құрайды.
Сонымен қатар су ресурстарына түсетін жүктемені азайту мақсатында күріш егісі оңтайландырылып, оның көлемі 20,2 мың гектарға қысқарды. Ал тамшылатып суару технологиясы қолданылатын мақта алқабы 29,8 мың гектарға ұлғаяды.
Ауыл шаруашылығы министрлігінде бекітілген егіс құрылымы ішкі нарықты әлеуметтік маңызы бар өнімдермен қамтамасыз етуге, сыртқы сұраныс конъюнктурасын ескеруге және баға құбылу тәуекелдерін төмендетуге мүмкіндік беретінін атап өтті.
