02.06.2026, 00:31
Қазақстанның Иранға ауыл шаруашылығы өнімдерін жеткізу көлемі 97%-ға өсті
Қазақстан мен Иран сауда, логистика және ауыл шаруашылығы өнімдерін өңдеу салаларындағы ынтымақтастықты нығайтуды көздеп отыр
Қазақстан Республикасының Ауыл шаруашылығы министрі Айдарбек Сапаров Иран Ислам Республикасының Өнеркәсіп, кен орындары және сауда министрі Сейед Мохаммад Атабакпен кездесті. Кездесу барысында тараптар агроөнеркәсіптік кешендегі ынтымақтастықты одан әрі дамыту, ауыл шаруашылығы өнімдерінің өзара саудасын кеңейту және инвестициялық өзара іс-қимылды нығайту мәселелерін талқылады.
«Қазақстан аграрлық саладағы Иранмен ынтымақтастықты кеңейтуге ерекше мән береді. Біздің нарықтарымыз бірін-бірі толықтырады, мұны ауыл шаруашылығы өнімдері саудасының тұрақты өсімі дәлелдейді», – деді Айдарбек Сапаров.
2025 жылдың қорытындысы бойынша Қазақстан мен Иран арасындағы агроөнеркәсіптік өнімдер саудасының көлемі 55,8%-ға өсіп, 342 млн АҚШ долларына жетті. АӨК өнімдерінің үлесі екіжақты сауданың жалпы көлемінің 79%-ын құрады.
Қазақстандық ауыл шаруашылығы өнімдерінің Иран нарығына экспорты 97%-ға өсіп, 238,5 млн АҚШ долларына жетті. Дәнді дақылдар экспорты екі еседен астам артып, 1,1 млн тоннаны немесе 225,3 млн АҚШ долларын құрады.
Кездесуде Иранға астық экспортын ұлғайту, сондай-ақ халықаралық ветеринариялық талаптар мен халал стандарттарына сәйкес келетін сиыр және қой етін жеткізуді арттыру мәселелеріне ерекше назар аударылды. Сонымен қатар тараптар өсімдік майлары мен басқа да азық-түлік өнімдерінің экспортын кеңейту мүмкіндіктерін атап өтті.
Сейед Мохаммад Атабак Иранның Қазақстанмен сауда-экономикалық байланыстарды одан әрі нығайтуға мүдделі екенін айтты.
«Қазақстан өңірдегі Иранның маңызды серіктесі болып табылады. Біз өзара тауар айналымын арттыруға, ауыл шаруашылығы өнімдерінің жеткізілімін кеңейтуге, логистикалық бағыттарды дамытуға, сондай-ақ өңдеу және агроөнеркәсіптік кооперация салаларындағы бірлескен жобаларды іске асыруға мүдделіміз», – деді Иранның Өнеркәсіп, кен орындары және сауда министрі.
Кездесуге қатысушылар инвестициялық ынтымақтастық мәселелеріне де ерекше назар аударды. Айдарбек Сапаров ирандық инвесторларды ауыл шаруашылығы өнімдерін өндіру және терең өңдеу жобаларына, оның ішінде дәнді және майлы дақылдарды өңдеу бағытындағы жобаларға қатысуға шақырды.
Келіссөздер қорытындысы бойынша тараптар агроөнеркәсіптік кешеннің негізгі бағыттары бойынша өзара іс-қимылды одан әрі дамытуға дайын екендіктерін растады.
