28.05.2026, 00:10
Продкорпорация 157 мың тонна бидайды экспортқа жібереді
Қазақстандық бидай Қытай, Ауғанстан, Тәжікстан және Әзербайжанға жеткізілуде
Продкорпорация жалпы құны 47,5 млрд теңгені құрайтын 380 мың тонна астық жеткізуге келісімшарттар жасасты. Оның ішінде 157 мың тонна азық-түлік бидайы экспортқа бағытталады — жеткізу жөніндегі келісімдерге қол қойылған. Қазіргі уақытта астық Қытай, Ауғанстан, Тәжікстан және Әзербайжанға жөнелтілуде.
Ішкі нарыққа 222,7 мың тонна астық жеткізуге келісімшарттар жасалды. Ұн тарту кәсіпорындарына 36,8 мың тонна өнім жөнелтілді, құс және мал шаруашылығы кәсіпорындары 21 мың тонна сатып алды, қайта өңдеу компаниялары — 40 мың тонна, ауыл шаруашылығы тауар өндірушілері — 33,4 мың тонна астық сатып алған. Қалған көлем коммерциялық негізде сатылды.
Өткен аптада ETC тауар биржасында көлемі 10 мың тонна болатын 3-сыныпты бидай партиясын сату бойынша мәміле жасалды. Сатып алушы Қостанай облысындағы ұн тарту кәсіпорны болды.
Астық нарығындағы баға құбылмалылығы жағдайында ұлттық оператор ішкі нарықтың тұрақтылығын сақтауға және азық-түлік қауіпсіздігін қамтамасыз етуге басымдық беріп отыр. Мұндай тәсіл әлеуметтік маңызы бар өнім шығаратын қайта өңдеу кәсіпорындары мен агроұйымдарға баға ауытқуларының әсерін азайтуға мүмкіндік береді.
Ішкі нарықта астық сату сапалық көрсеткіштерді ескере отырып жүзеге асырылады. Бидай бағасы келесі деңгейде белгіленген:
• клейковинасы 23–24% болатын бидай — тоннасына 102 мың теңгеден;
• клейковинасы 25–26% болатын бидай — тоннасына 105 мың теңгеден;
• клейковинасы 27–28% болатын бидай — тоннасына 114 мың теңгеден.
Құс және мал шаруашылығы кәсіпорындарын қолдау мақсатында 4-сыныпты бидай тоннасына 95 мың теңге көлеміндегі бекітілген жеңілдетілген бағамен сатылуда. Бұл отандық агрокәсіпорындарға жемдік астықты қолжетімді шарттармен сатып алуға мүмкіндік береді.
Қайта өңдеушілер, импорттаушылар және агроқұрылымдар тарапынан қосымша 235 мың тонна астық сатып алуға өтінімдер түсуін ескере отырып, ұлттық оператордың жалпы астық қоры азық-түлік бидайы мен жемшөптің мемлекеттік резервін қоса алғанда 875,2 мың тоннаға жетеді.
Қалыптастырылған астық қоры ішкі нарықтың қажеттіліктерін толық көлемде қамтамасыз етуге және елдегі азық-түлік тұрақтылығын сақтауға мүмкіндік береді.
