11.08.2026, 00:12
Қазақстанда құс етін өндіру бес жылда 58%-ға артты
Өндірістік қуаттардың артуы елдің азық-түлік қауіпсіздігін нығайтып, саланың экспорттық әлеуетін дамытуға ықпал етуде
Қазақстан құс етін өндіру көлемін ұлғайтып, ішкі нарықтың импортқа тәуелділігін біртіндеп азайтып келеді. Соңғы бес жылда отандық өндіріс көлемі 58%-ға өсіп, ішкі тұтынудағы қазақстандық құс етінің үлесі 58%-дан 78%-ға дейін артты.
Құс шаруашылығын дамыту агроөнеркәсіптік кешендегі мемлекеттік саясаттың басым бағыттарының бірі болып қала береді. Мемлекеттік қолдау шаралары кәсіпорындарға өндірістік қуаттарды кеңейтуге, қолданыстағы кешендерді жаңғыртуға және жаңа инвестициялық жобаларды іске асыруға мүмкіндік беруде.
2025 жылдың қорытындысы бойынша Қазақстанда 371,7 мың тонна құс еті өндірілді. Бұл 2020 жылғы 235,3 мың тоннамен салыстырғанда 58%-ға артық.
Өндірістің артуы ішкі нарықтағы отандық өнім үлесінің көбеюіне ықпал етті. Соңғы бес жылда Қазақстанның өз өндірісі есебінен құс етімен қамтамасыз етілу деңгейі 58%-дан 78%-ға дейін өсті.
Саладағы оң үрдіс сақталуда. 2025 жылы құс етінің өндірісі 372,5 мың тоннаны құрап, 2024 жылғы 360 мың тоннамен салыстырғанда 3,5%-ға артты.
2026 жылдың алғашқы алты айында Қазақстанда 192,4 мың тонна құс еті өндірілді.
Қазіргі уақытта елде жалпы жылдық қуаты 4,5 млрд жұмыртқа болатын жұмыртқа бағытындағы 37 өнеркәсіптік құс фабрикасы жұмыс істейді.
Сонымен қатар, 32 кәсіпорын құс етін өндіруге маманданған. Олардың жалпы өндірістік қуаты жылына 505 мың тонна құс етін құрайды.
Соңғы жылдары салада жаңа өндірістерді іске қосуға және қолданыстағы кәсіпорындарды кеңейтуге бағытталған бірқатар инвестициялық жобалар жүзеге асырылды. Олардың қатарында «Прима Кус», «Наурыз Агро KZ», «Turkey PVL» және «Алель Агро» кәсіпорындары бар.
Инвестициялық белсенділікті мемлекеттік қолдау құс шаруашылығы кәсіпорындарына өндіріс көлемін ұлғайтып қана қоймай, саланың әрі қарай дамуына қажетті заманауи өндірістік базаны қалыптастыруға мүмкіндік береді.
Өндірістік әлеуетті ұлғайту жұмыстары жалғасуда. Жақын жылдары жылына 220 мың тонна құс етін өндіретін қосымша өндірістік қуаттарды іске қосу жоспарланып отыр.
Ең ірі жобалар қатарында Алматы облысындағы «Aitas» АҚ және Жамбыл облысындағы «Алель Агро» АҚ өндірістік кешендерін салу және кеңейту көзделген. Олардың жиынтық қуаты жылына шамамен 170 мың тонна өнімді құрайды.
Аталған жобаларды іске асыру ішкі өндірісті одан әрі арттыруға, импортқа тәуелділікті азайтуға, ішкі нарықты толықтай отандық құс етімен қамтамасыз етуге және саланың экспорттық әлеуетін күшейтуге мүмкіндік береді.
