28.05.2026, 23:53
Қазақстандағы егіс науқаны барысында 16 млн гектардан астам алқапқа егін егілді
Ауыл шаруашылығы тауарын өндірушілер көктемгі дала жұмыстарын жалғастырып, 133 мыңнан астам трактор мен мыңдаған егіс техникасын пайдалануда
Қазақстанда көктемгі дала жұмыстары жалғасуда. Өңірлер әкімдіктерінің жедел мәліметтеріне сәйкес, қазіргі уақытта ауыл шаруашылығы дақылдары 16,3 млн гектар алқапқа себілген, бұл жоспарланған көлемнің 77%-ын құрайды.
Егіс алқаптарының басым бөлігін дәнді дақылдар алып жатыр — 11,2 млн гектар. Майлы дақылдар 3,6 млн гектарға, мал азықтық дақылдар 973,2 мың гектарға орналастырылған. Мақта 167,6 мың гектарға, картоп 116,9 мың гектарға, көкөніс дақылдары 112 мың гектарға, бақша дақылдары 81,1 мың гектарға егілді. Қант қызылшасына 22 мың гектар жер бөлінген.
Егіс науқаны елдің негізгі астық өндіруші өңірлерінде қарқынды жүргізілуде. Ақмола облысында 4,1 млн гектар, Қостанай облысында 3,7 млн гектар, Солтүстік Қазақстан облысында 2,7 млн гектар жерге егін себілді.
Дала жұмыстарын жүргізу үшін ауыл шаруашылығы өндірушілері 133,9 мыңнан астам тракторды, шамамен 5,6 мың жоғары өнімді егіс кешенін, 71,4 мың сепкішті және 188,5 мың топырақ өңдеу техникасын пайдалануда. Ауыл шаруашылығы өндірушілеріне техникалық қолдауды 70 сервистік орталық қамтамасыз етеді.
