Түркия қазақстандық тасымалдаушылар үшін теңіз порттарын ашып, транзиттік шектеулерді алып тастады

Қазақстандық көлік компаниялары Түркияның теңіз порттарында жүк тиеу және түсіру құқығына ие болды. Бұған дейін мұндай мүмкіндік тек түрік операторларына берілген еді. Бұл туралы ҚР Көлік министрлігінің баспасөз қызметі хабарлады.

Келісім Қазақстан–Түркия халықаралық автокөлік тасымалдары жөніндегі бірлескен комиссияның отырысында қол жеткізілді. Порт инфрақұрылымына қолжетімділіктен бөлек, тараптар транзиттік тасымалдарда рұқсат беру жүйесін алып тастап, еркін транзит режиміне көшуге уағдаласты. Үкіметаралық келісімге өзгерістер енгізілгенге дейін уақытша тетік қарастырылған: транзиттік бланкілерді шектеусіз алмасу.

Тағы бір қадам – құжат айналымын цифрландыру. 2025 жылдың соңына дейін екіжақты және транзиттік тасымалдарға арналған рұқсат бланкілері толықтай электронды форматқа көшіріледі. Ұқсас жүйе қазірдің өзінде Қытай және Өзбекстанмен жұмыс істейді.

Министрлік өкілдерінің айтуынша, «цифрға» көшу жүк рәсімдеу уақытын жылдамдатып, адами фактордың ықпалын азайтады. Түркиямен келісімдер қазақстандық тасымалдаушыларға жаңа логистикалық мүмкіндіктер ашады. Түрік порттарына қолжетімділік халықаралық бағыттарға шығуды жеңілдетсе, еркін транзит әкімшілік кедергілерді азайтып, жеткізу мерзімдерін қысқартады.
ҚР Көлік министрлігі бұл шаралар Қазақстанның аймақтық тасымал нарығындағы позициясын күшейтіп, сыртқы сауда жеткізілімдерінің тиімділігін арттырады деп күтуде. Келесі қадам – жаңа ережелерді тәжірибеде сынап, оларды екі ел арасындағы жаңартылған келісімде бекіту.