Қазақстанда майлы дақылдардың өнімі 5 млн тоннадан асуы мүмкін

Қазақстанда егін жинау науқаны аяқталуға жақын. Бүгінгі таңда аграрийлер 23 млн тонна астық жинап, дәнді және дәнді-бұршақты дақылдар егілген алқаптардың 96%-ында егін жинау жұмыстарын аяқтады. Майлы дақылдар өндірісінде айтарлықтай өсім байқалады: жиналған майлы дақылдар тұқымының көлемі өткен жылдың сәйкес кезеңіндегі көрсеткіштен 2,5 есе жоғары. Бұл туралы Үкімет отырысында ауыл шаруашылығы вице-министрі Азат Сұлтанов мәлімдеді.

Вегетациялық кезеңдегі күрделі ауа райы жағдайларына және бидай егіс алқаптарының 1,8 млн гектарға қысқаруына қарамастан, астықтың жалпы түсімі көпжылдық орташа көрсеткіштерден жоғары болады деп күтілуде. Ел бойынша орташа өнімділік 15,2 ц/га құрайды.

Ең жоғары өнімділік көрсеткіштері Алматы облысында — 53 ц/га, Жетісу облысында — 27,1 ц/га, Түркістан облысында — 25,4 ц/га, Жамбыл облысында — 22,1 ц/га және Батыс Қазақстан облысында — 21,1 ц/га деңгейінде тіркелді.

Жиналған астықтың сапасына да ерекше назар аударылуда. Вице-министрдің мәліметінше, элеваторларға жеткізілген бидайдың 72,4%-дан астамы үшінші сыныпқа жатады. Бірқатар өңірде бұл көрсеткіш айтарлықтай жоғары. Атап айтқанда, Ақмола облысында үшінші сыныпты бидайдың үлесі 90%-ға жетеді, ал оның 70%-ы Hi-Pro санатына — ақуыз бен желімшесі жоғары бидайға тиесілі.

Қазақстандық астыққа сыртқы нарықтарда да тұрақты сұраныс сақталуда. Қыркүйек айында жаңа өнім астығының экспорты 1,16 млн тоннаға жетіп, өткен жылдың сәйкес айымен салыстырғанда 13%-ға артты.

Майлы дақылдарды жинау барысында әсіресе айтарлықтай өсім байқалуда. Ауыл шаруашылығы министрлігінің мәліметінше, қазіргі уақытта 3,7 млн тонна майлы дақылдар тұқымы бастырылды. Бұл өткен жылдың сәйкес кезеңінде жиналған көлемнен 2,5 есе көп.

Азат Сұлтанов егін жинау жұмыстары аяқталғаннан кейін майлы дақылдардың жалпы түсімі 5 млн тоннадан асып, рекордтық деңгейге жетеді деп күтілетінін хабарлады.

Өндірістік көрсеткіштерге қол жеткізуге ауыл шаруашылығы тауарын өндірушілерді қаржыландырудың мемлекеттік бағдарламалары, ауыл шаруашылығы техникасы паркінің жаңартылуы және заманауи агротехнологияларды кеңінен енгізу ықпал етуде.

Биыл көктемгі егіс және егін жинау жұмыстарын қаржыландыру көлемін 750 млрд теңгеге дейін ұлғайту жоспарлануда. Сонымен қатар ауыл шаруашылығы техникасының жеңілдетілген лизинг көлемін 350 млрд теңгеге дейін жеткізу көзделген.

Отырыс барысында Премьер-министр Олжас Бектенов элеватор инфрақұрылымының жаңа өнімді қабылдауға дайындығын қамтамасыз ету қажеттігіне назар аударды.

Бұдан бөлек, отырыста қант қызылшасын өңдеу мәселесі қаралды. Қазіргі уақытта елде төрт қант зауыты іске қосылды, оның ішінде Жамбыл облысындағы кәсіпорында қызылшаны өңдеуге арналған жаңа желі бар.

Үкімет басшысы жыл сайын туындайтын қант қызылшасын өңдеу проблемаларының алдын алу қажеттігін атап өтіп, аталған мәселенің шешілуін бақылауға алуды тапсырды.