Қазақстанда асыл тұқымды мал басы көбейтілуде

Қазақстанда ауыл шаруашылығы жануарларының асыл тұқымды мал басын жаңарту жұмыстары жалғасуда. Жұмыс табынның генетикалық әлеуетін жақсартуға, мал өнімділігін арттыруға және сүт пен ет өндірісінің көлемін ұлғайтуға бағытталған.

2026–2030 жылдарға арналған Мал шаруашылығын дамытудың кешенді жоспарын іске асыруға 80 млрд теңге қарастырылған. Бағдарлама аясында 40 мың бас ірі қара және 20 мың бас ұсақ мал сатып алу жоспарланып отыр.

Ағымдағы жылы алыс шетелдерден Қазақстанға 7 234 бас ірі қара импортталды.

Шаруашылықтарды асыл тұқымды малмен толықтыру жұмыстары еліміздің бірнеше өңірінде жалғасуда.

Түркістан облысындағы «Азия Милк» тауарлы-сүт фермасына Даниядан голштин тұқымды ірі қараның кезекті партиясы — 165 бас жеткізілді. Алдыңғы жеткізілімді есепке алғанда, осы елден шаруашылыққа әкелінген малдың жалпы саны 330 басқа жетті.

Бұған дейін Даниядан голштин тұқымды 165 бастан өңірдегі тағы екі шаруашылыққа жеткізілген. «Майлыкен Ферм» фермасына 165 бас, сондай-ақ «Dar Organik» фермасына 165 бас мал жөнелтілді.

Солтүстік Қазақстан облысында «Буденное СК» ЖШС сүт кешенін малмен толықтыру жалғасуда. Германиядан голштин тұқымды 165 құнажыннан тұратын кезекті партия жеткізілді.

Бұл кәсіпорын үшін бесінші жеткізілім болды. Нәтижесінде әкелінген малдың жалпы саны 825 басқа жетті. Шаруашылық барлығы 1 200 бас мал импорттауды жоспарлап отыр.

Сүт кешенінің құрылысы өткен жылдың күзінде аяқталды. Осыдан кейін кәсіпорын табынды кезең-кезеңімен қалыптастыруға және өндірістік үдерістерді іске қосуға кірісті.

Алғашқы малдар фермаға ағымдағы жылдың басында жеткізілді. Наурыз айында шаруашылықта алғашқы бұзаулар алынды. Жоспарланған жеткізілімдер аяқталғаннан кейін кешен импорттық малмен толықтай қамтамасыз етіледі.

Табынды жаңарту жұмыстары Шығыс Қазақстан облысында да жүргізілуде. «Мойылды-Байконур» ЖШС тауарлы-сүт фермасына Ресей Федерациясының Пермь өлкесінен голштин тұқымды 224 құнажын жеткізілді.

Ферманың өндірістік қуаты 1 075 бас ірі қара ұстауға есептелген. Кәсіпорын заманауи жабдықтармен және қажетті ауыл шаруашылығы техникасымен қамтамасыз етілген, сондай-ақ өзінің жемшөп базасы бар.

Шаруашылықтың иелігінде 4 500 гектардан астам егістік жер бар, ол мал басын қажетті жемшөппен қамтамасыз ету үшін пайдаланылады.

Қарастырылған шараларды іске асыру ауыл шаруашылығы тауарын өндірушілерге мал басын кезең-кезеңімен жаңартуға, жануарлардың өнімділігін арттыруға және өндірістік қуаттарды ұлғайтуға мүмкіндік береді.

Жүргізіліп жатқан жұмыс отандық сүт пен ет өндірісін кеңейтуге, ауыл шаруашылығы кәсіпорындарының тиімділігін арттыруға және олардың өндірістік базасын нығайтуға бағытталған.