01.08.2025, 13:33
Қазақстанда жем-шөп техникасына арналған жеңілдетілген лизинг бағдарламасы қайта іске қосылды
ҚазАгроҚаржы жеңілдетілген бағдарламаны іске қосты
2025 жылғы 4 тамыздан бастап «ҚазАгроҚаржы» АҚ «Өз азығы» жеңілдетілген лизинг бағдарламасы бойынша өтінім қабылдауды қайта бастайды. Бұл бағдарлама — мал шаруашылығын жем-шөп техникасымен қамтамасыз етуге арналған негізгі қолдау тетіктерінің бірі.
«Өз азығы» бағдарламасы мал өсіру, бордақылау және ұстаумен айналысатын ауыл шаруашылығы тауар өндірушілеріне арналған. Бағдарламаның мақсаты — мал шаруашылығының азықтық базасын нығайту, өнімділікті арттыру және өндіріс көлемін ұлғайту.
Лизинг арқылы Қазақстанда және шетелде өндірілген жем-шөп дайындау техникалары мен жылжымалы суару жүйелерін сатып алуға қаржы беріледі. Қаржыландыру мерзімі — 10 жылға дейін, сыйақы мөлшерлемесі — жылдық 6%, бастапқы жарна — кемінде 15%.
Бағдарламаға жайылым немесе шабындығы бар, сондай-ақ жем-шөп өндіру немесе дайындаумен айналысатынын құжат жүзінде растай алатын ауыл шаруашылығы өндірушілері қатыса алады.
Сонымен қатар, лизинг алушылар қаржы алған қаржы жылынан кейінгі екі жыл ішінде жалақы қоры мен салық төлемдерін кемінде 10%-ға арттыруға міндетті.
