12.08.2026, 23:32
Солтүстік Қазақстан облысында құны 64 млрд теңге болатын агроөнеркәсіптік кластер жобасы іске асырылады
Жоба аясында бордақылау алаңдары, ет өңдеу кешені және сүт-тауар фермасы салынады
Солтүстік Қазақстан облысында ірі агроөнеркәсіптік кластер құру жөніндегі инвестициялық жобаны іске асыру жоспарлануда. Тиісті ынтымақтастық туралы меморандумға Петропавл қаласында өткен Qyzyljar Investment Forum — 2026 халықаралық инвестициялық форумы аясында «Солтүстік» ӘКК» АҚ мен «North Grain» ЖШС қол қойды.
Компанияның мәліметінше, жоба Айыртау ауданында заманауи агроөнеркәсіптік кешен құруды көздейді. Кешен ірі қара малды бордақылау мен өңдеуді, өнеркәсіптік қой шаруашылығын және сүт өндірісін біріктіреді.
Жоба аясында 20 мың бас ірі қара малға арналған бордақылау алаңы, ет өңдеу кәсіпорны, 20 мың бас ұсақ малға арналған қой шаруашылығы кешені, сондай-ақ 1,2 мың бас ірі қара малға арналған сүт-тауар фермасы салынады. Жобаның жалпы инвестиция көлемі 64 млрд теңгені құрайды.
«Солтүстік» ӘКК» АҚ мәліметінше, Инвесторларға қызмет көрсету және инновацияларды қолдау орталығы жобаны «бір терезе» қағидаты бойынша сүйемелдеуді жалғастырады. Инвесторға жобаны іске асырудың барлық кезеңдерінде қажетті ұйымдастырушылық және консультациялық қолдау көрсетіледі.
