Қытайдағы қуаңшылық: сарапшылар бидай өнімділігі 5%-ға төмендеуі мүмкін деп болжайды

Қытайдың негізгі ауыл шаруашылығы өңірлерінде орын алған қуаңшылық салдарынан 2025 жылы елдегі бидай өндірісі айтарлықтай төмендеуі мүмкін. Қытайдың жетекші бес саудагері мен сарапшысы арасында жүргізілген құпия сауалнамаға сәйкес, өнім көлемі шамамен 5%-ға азайып, 133–135 миллион тонна шамасында болуы мүмкін. Егер бұл болжам расталса, бұл 2018 жылдан бергі ең төменгі көрсеткіш болмақ (сол жылы 131 млн тонна бидай жиналған).

2024 жылы рекордтық 140 млн тонна өніммен салыстырғанда төмендеу күтілгенімен, сарапшылар ішкі қорлардың жеткілікті болуы және астыққа деген сұраныстың орташа деңгейде қалуы нарықтағы мүмкін тапшылықтың алдын алуға көмектесетінін айтады. Алайда, мұндай жағдай Қытай үкіметі үшін қолайсыз, себебі ел билігі азық-түлік қауіпсіздігін нығайту бағытында белсенді жұмыс жүргізіп келеді. Бұл жағдай импорт саясатын қайта қарауға итермелеуі мүмкін.

Геосаяси қауіптер мен климаттың өзгеруі
Қытай ауыл шаруашылығы жеткізілімін артып келе жатқан геосаяси қауіптерден, соның ішінде АҚШ-пен шешілмеген сауда қақтығыстарынан қорғауға ұмтылуда. Ағымдағы жылдың наурыз айында Пекин АҚШ-тан әкелінетін бидайға 15% кедендік баж салығын енгізді, бұл кезде импортқа сұраныс төмен болған еді. Шынында да, 2025 жылдың алғашқы төрт айында Қытайға бидай импорты соңғы жеті жыл ішіндегі ең төменгі көрсеткішке — небәрі 1 миллион тоннадан сәл аса түсті.

Алайда соңғы жылдары жиілеп кеткен ауа райының төтенше жағдайлары жеткізу тізбегін жедел қайта қарауды қажет етеді. Бұған екі жыл бұрынғы жағдай дәлел бола алады: қатты жауын-шашын Қытайдағы бидай егісін қатты зақымдап, елге 12 млн тонна көлемінде рекордтық импорт жасауға мәжбүр етті. Биыл қуаңшылық әсіресе Қытайдың солтүстік өңірлерінде қатты байқалады — бұл аймақтар дәстүрлі түрде бидай өсірілетін негізгі аумақтар саналады. Атап айтқанда, елдегі ең ірі өндіруші Хэнань провинциясы мен Шэньси аймағы қатты зардап шекті.

Болжамдағы алшақтықтар
Айта кетерлігі, халықаралық ұйымдардың өнім туралы болжамдары Қытай саудагерлерінің бағалауынан өзгеше. Халықаралық астық кеңесі мен АҚШ Ауыл шаруашылығы министрлігі Қытайдың биылғы бидай өнімділігіне қатысты болжамын 140 миллион тоннадан жоғары деңгейде ұстауда. Бұл алшақтықтар климат пен нарықтағы жағдайдың тұрақсыздығын және нақты болжаудың қаншалықты қиын екенін көрсетеді.