11.05.2026, 23:55
Қазақстан арқылы алғаш рет Түркиядан Қытайға ТХКБ бағыты бойынша контейнерлік пойыз жөнелтілді
Қазақстан аумағы арқылы транзит уақыты 83 сағатты құрады
Қазақстан арқылы алғаш рет Түркия — Қытай бағыты бойынша Транскаспий халықаралық көлік бағыты (ТХКБ) арқылы кері жүктеме ұйымдастырылды. Контейнерлік пойыз Түркиядан Қытайға ТХКБ бағытымен жөнелтілді. Жоба ҚТЖ-ның еншілес ұйымы — «KTZ Express» АҚ мен түркиялық Pasifik Eurasia Lojistik Dış Ticaret A.Ş. компаниясының бірлесуімен жүзеге асырылды.
Контейнерлік пойыз Измир — Ақтау порты — Алтынкөл станциясы — Қытайдың Фуцзянь провинциясындағы Чэнсян бағыты бойынша жүріп өтті.
ҚТЖ мәліметінше, Ақтау портынан Алтынкөл станциясына дейін Қазақстан аумағы арқылы транзиттік тасымал 83 сағатқа созылған.
Ұлттық компанияда кері жүктеме жобасының іске қосылуы Орта дәлізге деген қызығушылықтың артып келе жатқанын және оның Түркия мен Еуропа елдерінен Қытайға жүк тасымалдауда тиімді әрі бәсекеге қабілетті бағыт екенін көрсететінін атап өтті.
ҚТЖ деректеріне сәйкес, 2025 жылдың қорытындысы бойынша Қазақстан мен Түркия арасындағы жүк тасымалы көлемі 34%-ға артқан.
