08.05.2026, 00:30
Қазақстан мал шаруашылығы саласында Бразилия және Аргентинамен ынтымақтастықты кеңейтуде
Тараптар Қазақстанға асыл тұқымды мал жеткізу, генетика және селекцияны дамыту мәселелерін талқылады
Қазақстан аграрлық саладағы халықаралық ынтымақтастықты жүйелі түрде кеңейтіп, мал шаруашылығы бағытындағы әлемдік жетекші орталықтармен ұзақ мерзімді серіктестік орнатуды жалғастыруда. Осы мақсатта ауыл шаруашылығы вице-министрі Аманғали Бердалин Бразилия мен Аргентинаға жұмыс сапарымен барды.
Сапардың негізгі мақсаты генетика мен селекция саласындағы стратегиялық ынтымақтастықты дамыту, жоғары өнімді асыл тұқымды мал импортын кеңейту және заманауи агротехнологияларды енгізу болды.
Бразилияда қазақстандық делегация Латын Америкасындағы ең ірі агроөнеркәсіптік көрме — Agrishow 2026 көрмесіне қатысты. Іс-шара барысында «Ангус» және «Герефорд» тұқымдарын өсіру тәжірибесімен алмасу, эмбрион трансплантациясын қоса алғанда биотехнологияларды дамыту, сондай-ақ Қазақстанға асыл тұқымды малды тікелей жеткізу мәселелері талқыланды.
Вице-министр Бразилия Федеративтік Республикасының Ауыл шаруашылығы, мал шаруашылығы және азық-түлікпен қамтамасыз ету министрлігінің өкілдерімен, сондай-ақ Зебу өсірушілер қауымдастығымен келіссөздер жүргізді.
2025 жылдың қорытындысы бойынша Қазақстан мен Бразилия арасындағы агроөнеркәсіптік кешендегі тауар айналымы 10%-ға өсіп, 89,5 млн АҚШ долларына жетті.
Тараптар аграрлық саладағы ынтымақтастық әлеуетінің жоғары екенін атап өтіп, өзара сауда көлемін ұлғайту бойынша бірлескен жұмысты күшейтуге келісті.
Делегация мүшелері сондай-ақ етті мал шаруашылығына арналған «Senepol» және «Brangus» тұқымдарының генетикасымен айналысатын «Halim Laboratory» және «Agropecuaria 3G» компанияларының қызметімен танысты.
Аргентина астанасы Буэнос-Айресте елдің Ауыл шаруашылығы, мал шаруашылығы және балық шаруашылығы министрлігінің басшылығымен, сондай-ақ салалық және іскерлік орта өкілдерімен кездесулер өтті.
Келіссөздер барысында технология трансферті, ғылыми ынтымақтастықты дамыту және бірлескен инвестициялық жобаларды іске асыру мәселелері қаралды.
Аманғали Бердалин мал шаруашылығын дамыту Қазақстанның мемлекеттік аграрлық саясатының негізгі бағыттарының бірі екенін атап өтті. Осы мақсатта асыл тұқымды мал сатып алуға жылдық 6% мөлшерлемемен жеңілдетілген несие беру, сондай-ақ өнімділікті арттыру мен шаруашылықтарды технологиялық жаңғыртуға бағытталған инвестициялық субсидияларды көздейтін Мал шаруашылығын дамытудың кешенді жоспары әзірленген.
Вице-министрдің айтуынша, Аргентина мал шаруашылығы саласындағы әлемдік көшбасшылардың бірі болып табылады, ал Қазақстан үшін генетика мен селекция саласындағы озық шешімдерді енгізу және саланың сапалы дамуын қамтамасыз ететін бірлескен жобаларды іске асыру басым бағыт болып қала береді.
Тараптар Аргентинаның Ұлттық ауыл шаруашылығы технологиялары институтымен (INTA) ынтымақтастыққа ерекше назар аударды. Болашақта бұл өзара іс-қимылды бірлескен ғылыми-технологиялық жобаларды практикалық іске асыру деңгейіне шығару жоспарлануда.
Сонымен қатар делегация Буэнос-Айрес провинциясындағы алдыңғы қатарлы мал шаруашылығы кәсіпорындарының жұмысымен танысып, асыл тұқымды есеп жүргізу мен селекцияның заманауи жүйелерін, сондай-ақ жоғары өнімді «Ангус» тұқымын қоса алғанда, үздік мал өсіру тәжірибелерін көрді.
