30.09.2026, 00:39
Қазақстаннан астық пен ұн экспорты 15,5 млн тоннаға жетті
Қыркүйектің алғашқы 20 күнінде Қытайға астық жеткізу 2,5 есе, Өзбекстанға 20%-ға өсті
2025/2026 маркетингтік жылдың қорытындысы бойынша Қазақстан астық баламасында 15,5 млн тонна астық пен ұн экспорттап, отандық астық өнімдерін шетелдік нарықтарға жеткізуді жалғастырды.
Қазақстандық астық пен оны қайта өңдеу өнімдерінің экспорт географиясы Орталық Азия, Таяу Шығыс, Солтүстік Африка және Еуропа елдерін қамтиды.
Тасымал көлемінің өсуі ағымдағы кезеңде де сақталуда. «ҚТЖ» ҰК» АҚ мәліметінше, 2026 жылғы қыркүйектің алғашқы 20 күнінде 852 мың тонна астық тасымалданды. Өткен жылдың сәйкес кезеңімен салыстырғанда көрсеткіш 7%-ға артты.
Жалпы көлемнің 674 мың тоннасы экспортқа жөнелтілді. Экспорттық тасымал өткен жылдың сәйкес кезеңімен салыстырғанда 10%-ға өсті.
Жеткізілім көлемінің ұлғаюы бірнеше негізгі экспорттық бағытта тіркелді. Қыркүйектің алғашқы 20 күнінде Өзбекстанға 319 мың тонна астық экспортталды, бұл өткен жылдың сәйкес кезеңіндегі көрсеткіштен 20%-ға жоғары.
Тәжікстанға астық жеткізу көлемі 21%-ға артып, 116 мың тоннаға жетті. Осы кезеңде Қытайға 101 мың тонна астық экспортталды — бұл өткен жылғы көрсеткішпен салыстырғанда 2,5 есе көп.
Сонымен қатар астықты қайта өңдеу өнімдерін тасымалдау көлемі де артып келеді. Қыркүйектің алғашқы 20 күнінде ұн тарту өнімдерін тасымалдау көлемі 134 мың тоннаны құрады, бұл өткен жылдың сәйкес кезеңімен салыстырғанда 24%-ға жоғары.
Осылайша, ағымдағы кезеңде сыртқы нарықтарға астықтың да, оны қайта өңдеу өнімдерінің де жеткізілім көлемі артты.
