17.06.2026, 23:46
1 шілдеден бастап түрік бұғаздары арқылы транзит қымбаттайды
Тарифтердің өзгеруі Босфор мен Дарданелл арқылы порттарға кірмей өтетін кемелерге әсер етеді
Türkiye Today басылымының хабарлауынша, Түркия 1 шілдеден бастап Босфор және Дарданелл бұғаздары арқылы өтетін кемелер үшін алынатын алымдарды арттырады. Төлемдерді есептеу кезінде алтын франктің жаңа құны – 6,7 АҚШ доллары қолданылатын болады.
Жаңа көрсеткіш 2022 жылы белгіленген қазіргі 5,83 долларлық мөлшерлемеден шамамен 15 пайызға жоғары.
Бұғаздар режимі туралы Монтрё конвенциясына сәйкес, түрік бұғаздары арқылы порттарға кірмей өтетін кемелер санитарлық бақылау, маяктарды пайдалану және авариялық-құтқару қызметтері сияқты міндетті қызметтер үшін төлем жасайды. Алым мөлшері кеменің таза тоннажына (NRT) байланысты есептеледі және 1936 жылғы конвенцияда белгіленген есептік бірлік – алтын франкпен белгіленеді.
Алтын франк шамамен 0,290322 грамм таза алтынға тең және транзиттік алымдарды есептеудің негізгі көрсеткіші ретінде пайдаланылады. Оның АҚШ долларындағы баламасы Түркия билігі тарапынан мерзімді түрде қайта қаралып отырады.
Milliyet басылымының есебіне сәйкес, жаңа тарифтер күшіне енгеннен кейін таза тоннажы 10 мың тонна болатын кеме бұғаздар арқылы өту үшін шамамен 25 мың АҚШ доллары көлемінде төлем жасайды.
