02.09.2026, 23:55
Қазақстанда қант қызылшасын өңдеу қуаттары ұлғайтылуда
Ауыл шаруашылығы министрлігі қант қызылшасының егіс алқаптарын кеңейту жұмыстарын жалғастыруда
Қазақстанда қант қызылшасын жинауға және алдағы өңдеу маусымына дайындық жүргізілуде. Сала кәсіпорындарында өндірістік қуаттарды арттыру және жаңа өнімді қабылдауға дайындық жұмыстары атқарылуда.
Негізгі кәсіпорындардың бірі — Көксу қант зауыты. Ауыл шаруашылығы министрлігінің мәліметінше, қазіргі уақытта кәсіпорын тәулігіне 2 мың тонна қант қызылшасын өңдей алады.
Зауытты жаңғырту аясында оның өндірістік қуатын тәулігіне 3 мың тоннаға дейін арттыру жоспарланып отыр. Тиісті жұмыстарды ағымдағы жылдың қазан айында аяқтау көзделген.
Өңдеу мүмкіндіктерін кеңейту Тараз қант зауытында да қарастырылған. Қазан айында кәсіпорында тәулігіне 3 мың тонна өнімділікке ие жаңа желіні орнатуды аяқтау жоспарлануда.
Сонымен қатар Ауыл шаруашылығы министрлігі елдегі қант қызылшасының егіс алқаптарын кеңейту жұмыстарын жалғастыруда.
Ағымдағы жылы Қазақстанда 23,8 мың га жерге қант қызылшасы егілді. Бұл дақылдың негізгі егіс алқаптары Жамбыл облысы мен Жетісу облысында шоғырланған.
