29.07.2026, 00:22
Қазгидромет егістік топырағының жыртылатын қабатындағы ылғал қорының азайғанын хабарлады
Қазгидрометтің мәліметінше, шілденің екінші онкүндігінде елдің орталық және шығыс өңірлерінде топырақтың ылғалмен қамтамасыз етілуі жеткіліксіз болып қалды, ал оңтүстік және оңтүстік-шығыста ауа температурасы нормадан 3–6°С жоғары болды
Шілденің екінші онкүндігінде Қазақстандағы бақылау учаскелерінің басым бөлігінде топырақтың жыртылатын қабатындағы ылғал қорының төмендеуі жалғасты. Бұл туралы Қазгидрометтің аспаптық өлшеулер нәтижесіне негізделген онкүндік шолуында айтылған.
Елдің батысы мен солтүстігінде топырақтың жарты метрлік және бір метрлік қабаттарында ылғалмен қамтамасыз етілу деңгейі негізінен қанағаттанарлық және оңтайлы болып сақталды. Алайда жыртылатын қабаттағы өнімді ылғал қоры бақылау учаскелерінің көпшілігінде әрі қарай азайған.
Қазақстанның орталық және шығыс өңірлерінде жыртылатын және жарты метрлік топырақ қабаттарындағы өнімді ылғал қоры жеткіліксіз деңгейде қалды.
Республиканың оңтүстігі мен оңтүстік-шығысында күздік дәнді дақылдар өсірілетін аудандарда шілденің екінші онкүндігінде орташа ауа температурасы климаттық нормадан 3–6°С жоғары болды. Бұл өңірлерде жауын-шашын тіркелмеді.
Оңтүстік және оңтүстік-шығыс облыстардағы күздік егістіктерде негізінен толық пісу кезеңі байқалды. Жамбыл және Түркістан облыстарының жекелеген аудандарында күздік бидайды жинау жұмыстары басталды.
