28.07.2026, 00:18
Қазақстанға Нидерланд пен Армениядан әкелінген залалданған өнім партиялары кіргізілмеді
Анықталған бұзушылықтар бойынша әкімшілік іс жүргізу қозғалып, материалдар сотқа жолданды
«Алматы халықаралық әуежайы» фитосанитариялық бақылау бекетінде Қазақстан Республикасы Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің мемлекеттік инспекторлары қауіпті карантиндік зиянкес — батыс гүл трипсімен залалданған импорттық өнім партияларын анықтады.
Карантиндік нысан Нидерланд Корольдігінен әкелінген салат көгі партиясынан, сондай-ақ Армения Республикасынан жеткізілген 600 дана кесілген гүл партиясынан табылды.
Аталған фактілер бойынша өнім иелеріне қатысты Қазақстан Республикасының Әкімшілік құқық бұзушылық туралы кодексінің 400-бабының 2-бөлігі («Қазақстан Республикасының өсімдіктер карантині саласындағы заңнамасын бұзу») бойынша әкімшілік іс жүргізу қозғалды. Процестік шешім қабылдау үшін материалдар сотқа жолданды.
ҚР АШМ Агроөнеркәсіптік кешендегі мемлекеттік инспекция комитеті Қазақстан Республикасының Мемлекеттік шекарасы арқылы өткізу пункттерінде күшейтілген фитосанитариялық бақылауды жалғастыруда. Жүргізіліп жатқан іс-шаралар аса қауіпті карантиндік нысандардың әкелінуі мен таралуына жол бермеуге, елдің фитосанитариялық қауіпсіздігін қамтамасыз етуге және отандық агроөнеркәсіптік кешенді қорғауға бағытталған.
