28.07.2026, 23:58
Ауыл шаруашылығы министрлігінде 2026 жылдың бірінші жартыжылдығындағы мал шаруашылығының даму қорытындылары шығарылды
Бірінші жартыжылдықтың қорытындысы бойынша саланың жалпы өнімі 2,058 трлн теңгеден асты, ал ет, сүт және жұмыртқа өндірісі өсім көрсетті
2026 жылдың бірінші жартыжылдығындағы мал шаруашылығы саласының жұмыс қорытындылары Ауыл шаруашылығы министрі Айдарбек Сапаровтың төрағалығымен өткен кеңесте қаралды.
Мал шаруашылығы агроөнеркәсіптік кешенді дамытудың басым бағыттарының бірі болып қала береді.
Министрдің айтуынша, Мемлекет басшысының тапсырмасы бойынша саланы одан әрі дамытуға бағытталған Кешенді жоспар әзірленді. Оның сөзінше, мемлекеттік қолдау шаралары ауыл шаруашылығы тауарын өндірушілерге уақытылы жеткізіліп, өндіріс көлемінің артуына және саланың тиімділігін арттыруға ықпал етуі тиіс.
«Осыған байланысты жедел шешімді талап ететін мәселелерді талқылауымыз қажет», – деді Айдарбек Сапаров.
Мал шаруашылығы департаментінің директоры Бағлан Аймырзаевтың мәліметінше, 2026 жылдың қаңтар–маусым айларының қорытындысы бойынша мал шаруашылығының жалпы өнімі 2,058 трлн теңгеден асты. Нақты көлем индексі 104,4%-ды құрады.
Саланың барлық негізгі бағыттары бойынша оң өсім тіркелді. Еттің барлық түрін өндіру 5,5%-ға, сүт өндірісі 2,4%-ға, жұмыртқа өндірісі 7,9%-ға артты. Сонымен қатар ауыл шаруашылығы жануарларының саны да ұлғаюда.
Кешенді жоспар аясында «Игілік», «Береке» және «Жайлау» жеңілдетілген несиелеу бағдарламалары іске қосылды. Олар асыл тұқымды мал сатып алуды және жайылымдық мал шаруашылығын жылдық 6% мөлшерлемемен қаржыландыруды, сондай-ақ айналым қаражатын жылдық 5% мөлшерлемемен толықтыруды көздейді.
Бұдан бөлек, мамандандырылған бордақылау алаңдарын құру және дамыту жұмыстары жалғасуда.
Қабылданып жатқан шаралар нақты нәтижесін бере бастады. Ауыл шаруашылығы құрылымдарында еттің барлық түрін өндіру көлемі 7,9%-ға өсті.
Кеңесте саланы жемшөппен қамтамасыз ету мәселесіне де ерекше назар аударылды. Өңірлердің жедел мәліметтері бойынша 16 млн тоннадан астам мал азығы дайындалды, оның ішінде 13,8 млн тоннасы – пішен.
Кеңес қорытындысында Айдарбек Сапаров мал шаруашылығы саласының қол жеткізген даму қарқынын сақтап қалу қажеттігін атап өтті.
«Басты міндет – мал шаруашылығының тұрақты өсімін қамтамасыз ету. Бұған Мал шаруашылығын дамытудың кешенді жоспарын жүйелі іске асыру, өндіріс көлемін нақты ұлғайту, кәсіпорындардың тиімді жұмыс істеуі және қолда бар әлеуетті барынша пайдалану арқылы қол жеткізу қажет», – деп түйіндеді министр.
