16.06.2026, 00:28
Қытаймен шекарада ветеринариялық талаптарды бұза отырып әкелінген 113 тоннадан астам өнімнің жолы кесілді
ҚХР-дан жеткізілген ұсталған өнім қауіпті деп танылып, заңнама талаптарына сәйкес жойылды
2026 жылдың басынан бері Жетісу облысы Панфилов ауданындағы «Нұр Жолы» ветеринариялық бақылау бекетінде Қытай Халық Республикасынан жүк әкелу және транзиттеу кезінде ветеринариялық заңнаманы бұзудың жеті дерегі анықталды.
Бақылау іс-шаралары барысында ҚР Ауыл шаруашылығы министрлігі Ветеринариялық бақылау және қадағалау комитетінің аумақтық инспекциясының қызметкерлері бақылауға жататын 113 тоннадан астам өнімді ұстады. Оның ішінде 66,4 тонна мұздатылған тауық еті филесі, 46,8 тонна үйрек еті және 22 тонна балық жемі бар.
Тексеру нәтижесінде аталған өнімдердің импорты мен транзиті Қазақстанда ҚХР-дан келетін құс шаруашылығы өнімдеріне қатысты енгізілген уақытша ветеринариялық шектеулерді бұза отырып жүзеге асырылғаны анықталды.
Тексеру қорытындысы бойынша екі жеке тұлға мен төрт заңды тұлға әкімшілік жауапкершілікке тартылды.
Қазақстан Республикасының заңнамасы мен ЕАЭО нормативтік құқықтық актілеріне сәйкес ұсталған өнімдер қауіпті деп танылып, жоюға жатқызылды. Барлық өнім 2026 жылғы наурыз-мамыр айлары аралығында Панфилов ауданындағы арнайы жабдықталған алаңда өртеу әдісімен жойылды.
ҚР АШМ Ветеринариялық бақылау және қадағалау комитеті сыртқы экономикалық қызметке қатысушыларды Қазақстанның мемлекеттік шекарасы арқылы бақылауға жататын жүктерді тасымалдау кезінде белгіленген талаптарды қатаң сақтауға шақырады.
