29.06.2026, 23:42
Қазақстанда жаңа «Топырақты қорғау туралы» заң қабылданды
Заң жердің құнарлылығын сақтауға және агроөнеркәсіптік кешеннің тұрақты дамуын қамтамасыз етуге бағытталған
Қазақстан Республикасы Парламенті Сенаты «Топырақты қорғау туралы» заңды, сондай-ақ жер қатынастары мен агроөнеркәсіптік кешенді дамыту мәселелерін реттейтін заңнамаға енгізілетін ілеспе түзетулер пакетін мақұлдады.
Жаңа заң топырақты қорғау саласындағы мемлекеттік саясаттың бірыңғай құқықтық және ұйымдастырушылық негіздерін қалыптастырады және олардың жай-күйін басқарудың заманауи тәсілдерін енгізуді көздейді.
Құжатта топырақты қорғау саласындағы мемлекеттік саясаттың бірыңғай ұғымдары, мақсаттары мен қағидаттары бекітілген, мемлекеттік органдардың өкілеттіктері нақты ажыратылған, топырақтың жай-күйіне кешенді мониторинг жүргізудің бірыңғай жүйесін құру қарастырылған. Сонымен қатар, жер учаскелерінің меншік иелері мен жер пайдаланушылар үшін топырақ құнарлылығын сақтау, молайту және қалпына келтіру жөніндегі міндетті талаптар белгіленеді. Бұдан бөлек, заң топырақтық зерттеулер жүргізуді, агрохимиялық талдау жасауды және жерді ұтымды пайдаланудың заманауи технологияларын енгізуді қамтитын ғылыми сүйемелдеуді күшейтеді.
Сонымен қатар, сенаторлар Қазақстан Республикасының Жер кодексіне және «Агроөнеркәсіптік кешенді және ауылдық аумақтарды дамытуды мемлекеттік реттеу туралы» заңына өзгерістер қабылдады. Бұл түзетулер қолданыстағы заңнаманы жаңа заңның ережелерімен сәйкестендіруге бағытталған.
Атап өтілгендей, «Топырақты қорғау туралы» заңның қабылдануы жер ресурстарын ұтымды пайдалану жөніндегі мемлекеттік саясатты іске асырудың маңызды кезеңдерінің бірі болды. Заңды іске асыру топырақты қорғау саласындағы мемлекеттік басқарудың тиімділігін арттыруға, жердің тозу қарқынын төмендетуге, топырақ құнарлылығын сақтауға және қалпына келтіруге, сондай-ақ агроөнеркәсіптік кешеннің тұрақты дамуы мен елдің азық-түлік қауіпсіздігін нығайтуға жағдай жасауға мүмкіндік береді.
Бұдан басқа, жаңа заң заманауи агротехнологияларды кеңінен қолдануға, саланың ғылыми қамтамасыз етілуін дамытуға және жер қатынастарының барлық қатысушыларының Қазақстанның ең маңызды табиғи ресурстарының бірі – құнарлы топырақты сақтау жөніндегі жауапкершілігін арттыруға құқықтық негіз қалыптастырады.
