08.06.2026, 00:46
Қостанай облысында «Тобыл» көлік-логистикалық кешені жобасын іске асыру жеделдетіледі
Құрылыс аяқталғаннан кейін кешен контейнерлік тасымал көлемін 20%-ға арттыруға мүмкіндік береді
Қазақстан Премьер-Министрінің бірінші орынбасары Нұрлыбек Нәлібаев Қостанай облысына жұмыс сапары барысында өңірдің өнеркәсіптік және аграрлық әлеуетінің дамуымен танысып, ірі өндірістік және инфрақұрылымдық жобалардың іске асырылу барысын бағалады.
Сапар қорытындысы бойынша инвестициялық жобаларды қолдау, өңірдің экспорттық мүмкіндіктерін кеңейту, индустриялық аймақ инфрақұрылымын дамыту, «Тобыл» көлік-логистикалық кешенін қаржыландыруды жеделдету және ауыл шаруашылығы өнімдерін терең өңдеу жобаларын іске асыру бойынша бірқатар тапсырмалар берілді.
«Тобыл» көлік-логистикалық кешені құны шамамен 64 млрд теңгені құрайтын өңірдегі ірі инфрақұрылымдық жобалардың бірі болып табылады. Жоба Қостанай облысының транзиттік әлеуетін нығайтуға бағытталған. Құрылыс толық аяқталып, нысан пайдалануға берілгеннен кейін контейнерлік тасымал көлемі 20%-ға артады деп күтілуде.
Жобаның бірінші кезеңі аясында ұзындығы 2 723,7 метр теміржол желілері мен көлемі 26 мың шаршы метр контейнерлік алаң салынды. Кешен құрылысын толық аяқтау 2027 жылға жоспарланған.
«ТЛК Тобыл» ЖШС директоры Айдын Әлімовтің айтуынша, кешен іске қосылғаннан кейін өңірдің көлік-логистикалық мүмкіндіктері едәуір артып, халықаралық жүк тасымалының негізгі хабтарының бірін қалыптастыруға жағдай жасалады.
Сапар барысында Премьер-Министрдің бірінші орынбасарына өңірдің инвестициялық әлеуетін арттыруға бағытталған екі ірі жоба да таныстырылды. Олар – астықты терең өңдеу зауыты мен тұрақты авиациялық отын (SAF) өндіретін кәсіпорын құрылысы.
