01.07.2026, 01:41
Қазақстанның бірқатар өңірлерінде жүгеріден жоғары өнім күтілуде
Еліміздің жекелеген аудандарында дақыл өнімділігі көпжылдық орташа көрсеткіштен жоғары болуы мүмкін
Қазгидромет 2026 жылға арналған Қазақстандағы дәндік жүгері өнімділігінің алдын ала болжамын жариялады. Мамандардың есептік деректеріне және қалыптасқан әрі күтілетін агрометеорологиялық жағдайларды ескере отырып, еліміздің бірқатар өңірлерінде жүгері өнімділігі көпжылдық орташа деңгейде немесе одан жоғары болады деп күтілуде.
Жетісу облысында Ескелді және Қаратал аудандарында өнімділік көпжылдық орташа көрсеткіштен жоғары болады деп болжануда. Ал Панфилов ауданында көрсеткіш көпжылдық орташа деңгейде болады.
Алматы облысында алдын ала бағалауға сәйкес, жүгері өнімділігі көпжылдық орташа деңгейге сәйкес келеді немесе одан жоғары болады.
Жамбыл облысында Сарысу және Байзақ аудандарында өнімділік нормадан жоғары болады деп күтілуде. Қордай, Меркі, Жамбыл және Шу аудандарында өнімділік көпжылдық орташа деңгейде сақталады.
Түркістан облысында аудандардың басым бөлігінде жүгері өнімділігі көпжылдық орташа деңгейге жақын болады деп болжануда. Ал Ордабасы және Шардара аудандарында көрсеткіштер нормадан жоғары болады деп күтілуде.
