06.04.2026, 01:05
Қазақстандық экспорттаушыларға Қытайға жем өнімдерін жеткізу бойынша жаңа талаптар түсіндірілді
Кәсіпорындар жаңартылған стандарттар бойынша жұмыс істеу үшін қайта тіркеуден өтуде
3 сәуірде ҚР АШМ Агроөнеркәсіптік кешендегі мемлекеттік инспекция комитетінде салалық бірлестіктердің, «Атамекен» ҰКП, «Қазақстан темір жолы» ҰК» АҚ, «Продкорпорация» ҰК» АҚ және экспорттаушы компаниялардың қатысуымен жұмыс кеңесі өтті. Қатысушыларға ҚХР Бас кеден басқармасының жаңартылған фитосанитарлық талаптарын ескере отырып, Қытайға жем ұнын жеткізудің өзекті тәртібі ұсынылып, жаңа регламенттер егжей-тегжейлі түсіндірілді.
Министрліктің мәліметінше, Қытай тарапы талаптарының өзгеруіне байланысты қазақстандық кәсіпорындарды өнімнің жаңа түріне — құрамында 80% бидай және 20% арпа бар жем қоспасына қайта тіркеу жүргізілуде. Қазіргі таңда ҚХР Бас кеден басқармасының тізіліміне 96 отандық кәсіпорынның 27-сі енгізілген, қалғандары бойынша өтінімдер жолданған. Жем қоспасын экспорттауға арналған құжаттарды қабылдау 2026 жылғы 9 сәуірді қоса алғанда жалғасады.
Кездесу барысында енгізілген өзгерістердің рәсімдік сипатта екені және жеткізілімдерді халықаралық стандарттарға сәйкес жүйелеуге бағытталғаны атап өтілді, бұл ұзақ мерзімді перспективада экспорттың тұрақтылығын қамтамасыз етеді.
Сондай-ақ АШМ жаңа талаптар күшіне енгенге дейін жөнелтілген өнімдер бойынша кәсіпкерлерді қолдау шараларын қабылдап жатқаны айтылды. Ведомство жүктердің шекарадан жедел өтуіне жәрдемдесіп, өткізу пункттерінде кідірістер мен жиналудың алдын алуға бағытталған жұмыстар жүргізуде.
